Goodbye is not Forever
CEBU, Philippines - Mihugpa sa daklit ang kahilom. Si Eking miduko, daw sa dihay gihunahuna. Ingon sa gipiga niini’g maayo ang tampihak sa unsay ikatabang kang Albert. Taudtaod gayod ang iyang paghinuktok.
Unya naigking si Albert sa dihang kalit kaayong nanglitik sa iyang mga tudlo si Eking.
“Husto!” tuaw ni Eking nga kalit lang mingisi. “Niay maayong paagi nga akong nahunahunaan, Brod. Bisa’g asa pang dapita mopaingon si Josheba, segurado gayod nga mobalik siya kanimo kun buhaton mo kini kaniya.”
“Ti-tinuod ba, Brod?” matud ni Albert nga mibati’g kahinangop. “Unsa man kanang paagiha?”
Wala dayon motubag si Eking sa iyang gipangutana. Miipis kini’g beer sa baso niini ug miinom. Si Albert mahinamon kaayo nga nagpaabot sa tubag sa iyang higala.
“Unsa kanang giingon mong paagi, Brod?” subling nangutana ni Albert nga gigamhan na ang kahiladman sa tumang kahinam.
Mipahiyom si Eking. Ug mihunghong kini kang Albert. Si Albert namati pag-ayo sa gihunghong sa iyang higala kaniya.
Unya nangahilom silang duha. Si Albert miduko, nahiunlod sa halawom nga paghunahuna. Samtang si Eking nagdiyong usab ang mga mata nga nagtutok sa ulitawo nga sama sa nagdamgo sa buntag. -- Sumpayan pa
- Latest
