Paraygon nga Engkanto

Misirit lang paglakaw si Laarni paingon sa ngilit nga bahin sa pangpang nga daghan ang mga nanubo nga kahoy. Kalit lang nahanaw ang dalaga sa panan-aw ni Jupet.

Walay nahimo si Jupet gawas sa pagpadagan na lang sa iyang motor paingon sa ilang dapit sa Barangay Bosogon. Gisugilon niya ang iyang kasinatian sa mga kauban niya nga drayber og habal-habal.

“Hala, nahinumdom ka niadtong gisugilon nako nimo bai Jupet nga may misakay nako ug nagpahatud didto sa Sitio Pungtod sa Barangay Lambusan? Kadtong nanawag sa iyang mama atubangan sa dakung kahoy?” matud ni Nilo nga kaubang drayber sa habal-habal ni Jupet.

Nagkatinutokay ang mga kaubang drayber sa habal-habal ni Jupet. “Buot ba ninyo nga ipasabot nga dili ingon kanato si Laarni? Aw, tinuod nga may pagka mestiza si Laarni ug dili sama sa kasagaran nato nga kababayen-an sa baryo,” ni Jupet pa.

Nagkataw-anay ang mga drayber sa habal-habal apan si Jupet nakahinuktok. Gusto ni Jupet nga inigka-udto, mobalik siya sa Sitio Pungtod sa Barangay Lambusan kay buot g’yud niya sutaon kun usa ba ka engkantada si Laarni.

Tuod, ala una sa hapon mainampingon si Jupet sa iyang mga lakang nga mipaingon sa ngilit nga bahin sa pangpang nga didto mipaingon si Laarni kaganinang buntag.

Nakurat si Jupet kay ang dapit nga girombo ni Laarni kaganina, ngilit na man diay nga bahin sa pangpang nga nahimutangan sa dakung punoan sa kahoy. Karon, natibuok na gayud sa huna-huna ni Jupet nga usa ka engkantada si Laarni.

Apan bisan og nasayran na ni Jupet nga engkantada si Laarni, wala siya mahadlok. Karon, gusto na niya nga makita pag-usab ang dalaga. Nabatyag ni Jupet nga may talagsaon siya nga pagbati sa dalaga.

 “Laarni! Laarni! Pakita nako Laar!” nagtabi-tabi si Jupet samtang naghangad-hangad siya sa dakung punoan sa kahoy. Hoyhoy ang abaga ni Jupet kay bisan giunsa niya sa pagsangpit, walay Laarni nga mipatim-aw.

“Gimingaw ko nimo Laarni, pakita pag-usab kanako,” subli nga nagpangyamyam si Jupet. Mipauli na lang si Jupet sa ilang dapit sa Bosogon, usa ka barangay nga mga upat ka kilometro gikan sa Lambusan.

Gibati og kahaw-ang si Jupet nga wala niya ikakita si Laarni pag-adto niya sa pangpang. Mihigda si Jupet sa lantay sa usa ka tindahan daplin sa karsada.

Kalit nga mitimbakuwas si Jupet kay nakabatyag siya nga dunay mipikpik sa iyang abaga. (Sumpayan)