Pagdumot

Mikulismaot ang nawong ni Jessica. Mitalikod siya sa iyang inahan. Hugot nga pagsupak sa iyang hunahuna ang nagpasulabi. Gibuntog ang sugyot sa iyang kasingkasing.

“Dili ko makapasaylo niya, sa pagka-karon, Ma.”  Inggit ang tingog ni Jessica.

“Igsuon mo si Thelma, kaluha mo siya. Duha ra mong magsuon. Nasayop si Thelma apan nangayo siya’g pasaylo nimo. Dakong masakiton si Thelma.”

Naghilak si Nang Lagring. Biyuda na siya apan nangadagko sila si Jessica ug Thelma nga wala maghunahuna si Nang Lagring nga magminyo pag-usab bisan nag-edad pa siya’g trayenta dihang nabiyuda tungod sa nahitabong kalit nga kamatayon sa iyang bana nga giurom. Nagtrabaho sa opisina si Nang Lagring. Ang iyang panahon iyang gitingob sa pagpadako ug pagpa-edukar kang Jessica ug Thelma, nga karon pulos na mga propesyonal.

“Mao lagi, Ma. Duha ra ming magsuon. Gimahal unta ko niya. Pero iyang gigamit ang among pagkakaluha aron mailog niya si Homer!” Mitulo ang mga luha ni Jessica. “Nasayod si Thelma kun unsa ko ka mahal si Homer. Nasayod siya, Ma, nga boyfriend ko si Homer.”

“Dili ka ba diay makapasaylo sa imong igsuon, Jessica, nga duna na may tagal ang iyang kinabuhi? Grabe na ang kanser sa iyang tutoy.” Mibakho si Nang Lagring.

“Sakit kaayo, Ma, ang iyang gibuhat nako!”

Managsama gayod og hitsura, pamarog ug linihokan si Jessica ug Thelma. Nagtuo si Homer nga si Jessica ang iyang gikadulog sa motel. Apan si Thelma diay.

“Napugos si Homer sa pagpakasal kang Thelma, Ma, kay mimabdos man kini. Giplanohan niya ang pag-ilog ni Homer gikan nako!”

Nakasabot si Nang Lagring sa gibati ni Jessica. Iyang gigakos si Jessica. Naghinilakay sila pag-ayo.

Usa ka buntag, mao na lamay nasayran ni Jessica nga diha siya sa lawak sa ospital nga nahimutangan ni Thelma. Daot na kaayo si Thelma. Mora’g gilawalawaan na ang kalimutaw. Hinay na kaayo’g tingog.

“S-salamat, Jessica, nga nia ka.” Naghilak si Thelma. “Salamat nga gipasaylo na ko nimo.”

“Nagkinahanglan ka sa akong pasaylo, Thelma, aron makapahuway ka na. Way bisan unsa nga hitabo nga makabugto sa atong panag-igsuon.”

Mipahiyom si Thelma. Ang pasaylo lamang ni Jessica ang iyang gihulat. Unya nabugtoan siya sa gininhawa. Migakos si Jessica kang Thelma. Midanguyngoy siya.

Nagpatulo si Jessica sa iyang mga luha dihang gisulod na sa nitso ang lungon nga gisudlan sa patay nga lawas ni Thelma. Usa ka semana nga gihaya si Thelma. Ug karon gihatod na siya sa kataposan niyang pahulayan. Diha sa tupad ni Jessica si Homer.

“Wala na si Thelma.” Hapit dili madungog ang tingog ni Homer.

Gilingi ni Jessica si Homer. Nagtinan-away sila si Homer. Mipiyong si Jessica. Gipamatyag niya ang kainit sa palad ni Homer nga mikupot sa iyang kamot. (Kataposan)