Paraygon nga Engkanto

Gula 4

Natingala kaayo si Jupet kun nganong kalit lang nahanaw si Laarni sulod lang sa pipila ka segundos gikan sa pagbiya niya didto sa punoan sa dakung kahoy nga Acacia duol sa Bogo Central School.

Aron paghanaw sa iyang kalibog, gibalik ni Jupet ang dapit duol sa punoan sa Acacia. Apan wala na g’yud niya igkita pa si Laarni. Gilibot niya ang iyang panan-aw sa ubang lugar, apan wala g’yuy bisan anino ni Laarni.

Kay alas utso pa man sa buntag magpakuha si Laarni didto gihapon sa duol sa punoan sa Acacia, mipaingon usa si Jupet sa Plaza sa Bogo kay duna pa may daghang kalingawan.

Pagkabuntag na, nangandam na si Jupet aron mobalik sa dapit nga gikasabotan nila ni Laarni nga kuhaon ang dalaga. Mideritso si Jupet paingon sa City Hall sa Bogo aron pag-aninaw sa palibut.

Pag-agi niya sa punoan sa Acacia wala g’yud siya’y tawo nga nakita. Mituyok siya sa karsada aron mobalik kay adto niya paabuton si Laarni sa usa ka tindahan atbang sa Bogo Central School nga malantaw ra ang Acacia.

Apan nakurat siya kay duna nay babaye nga nagbarug atubangan sa punoan sa kahoy nga nahimutang daplin sa karsada. Mao kini ang dapit nga gikasabutan nila ni Laarni nga anha siya kuhaon.

Tuod, wala masayop si Jupet, si Laarni gayud ang nagpahiyom kaniya nga nagbarug daplin sa karsada atubangan sa dakung punoan sa kahoy.

“Sayo ka man lagi nga mikuha nako, wala pa may alas utso,” ni Laarni pa. Naaninaw g’yud ni Jupet ang kaanyag ni Laarni. Daw mestisa kini nga tan-awon tungod sa buwagaw niini nga buhok.

“Gusto lang ko nga dili ka magpaabut nako Laarni… mas maayo pa nga ako ang magpaabut kay sa ikaw ang mahago. Apan pag-agi nako dinhi kaganina wala ka pa man unya mikalit ka man lang og butho?” matud ni Jupet.

Wala motubag si Laarni sa gisulti ni Jupet. Nasayud siya nga nahibulong kaayo si Jupet sa mga panghitabo nga iyang nasaksihan sukad pa kaganina sa ilang panag-uban.

Miangkas dayon si Laarni sa motor ni Jupet. Sa gihapon nangalimyon sa kahumot si Laarni. Paspas ang pagpadagan ni Jupet sa motorsiklo ug dali ra sila nga miabut sa Barangay Lambusan. Gilantaw ni Jupet ang palibut pagsaylo na nila sa taytayan sa Barangay Tambongon ug wala gayud siya’y nakita nga balay.

“Asa man g’yud dapit ang inyo Laarni? Wala man ko’y nakita nga balay dinhing lugara?” giingnan ni Jupet si Laarni. “Naa ra sa unahan nasalipdan sa kakahoyan. Makatultol ka ra unya,” ni Laarni pa sa dayon niining kanaug sa motor. (Sumpayan)