Paraygon nga Engkanto

Gula

Hinay ra ang pagpadagan ni Jupet sa iyang motorsiklo. Gituyo niya kini aron dugay silang moabut sa Bogo gikan sa Barangay Lambusan kay giganahan siya nga migunit sa iyang hawak si Laarni samtang nag-angkas sa motor.

Pag-abot nila sa eskena sa Barangay Dapdap, gisuwayan og pakig-estorya ni Jupet si Laarni. Molingi siya ngadto kang Laarni sa matag niya sulti aron siya madunggan, apan ang tubag ni Laarni klaro kaayo niya nga mapaminaw kay ang baba niini naa man g’yud sa duol sa iyang dunggan.

“Nganong didto ka man mag-atang og sakyanan nga mingaw man to’ng lugara Laarn?” pambukas nga pamahayag ni Jupet. “Tua man didto ang among balay sa dapit nga akong gisakyan,” ni Laarni pa.

Wala dayon motubag si Jupet. Iyang gibalik-handom ang maong lugar nga diin si Laarni misakay sa iyang motor. Apan wala gayud siya makakita og balay kay mingaw ang dapit nga gitawag og Pungtod nga nahimutang daplin sa dagat ug dunay pangpang.

“Wala man ko’y nakit-an nga balay didto Laarn? Pirmi man ko nga mag-agian diha bisan sa adlaw wala g’yud ko makakita’g balay,” miinsistir si Jupet. “Nasalipdan lang tingali sa mga kahoy mao nga wala ka makakita,” ni Laarni.

Bisan og si Laarni nag-angkas sa luyo ni Jupet, apan mapanimaho gihapon ni Jupet ang nangalimyon niya nga pahumot. “Mouli ka ba dayon Laarn? Kay pwede ra man tika nga huwaton” gipangutana ni Jupet si Laarni kay iyang nahuna-hunaan nga huwaton ra niya ang dalaga.

“Ugma pa ko sa buntag mopauli Jupet. Kun huwaton ko nimo, magkita ta ugma sa buntag sa atubangan sa Bogo Central School,” matud ni Laarni. Didto nagpahatud si Laarni duol sa mao nga tunghaan.

“Diha lang ihunong duol sa punoan sa Acacia,” giingnan ni Laarni si Jupet. Milingi-lingi si Jupet sa palibot apan layo ra kaayo ang kabalayan ug ngitngit ang palibut. Ang dan-ag ra sa kahayag gikan sa layo nga suga sa poste ang naghatag og kahayag sa palibut.

“Lakaw na, anhi lang ko dinhi kuhaa ugma mga alas utso sa buntag,” matud ni Laarni human mitunol ni Jupet og tibuok P500 nga plete. “Kadaku ba ani?” ni Jupet nga nahingangha sa kantidad nga gihatag kaniya sa dalaga.

Igo lang mingisi si Laarni. Mipadagan si Jupet sa motor apan mihunong siya sa unahan ug nagpatoo nga mangihi apan ang iyang tumong mao nga lantawon si Laarni kun asa mopaingon. Apan wala na si Laarni nga kaganina nagbarug sa duol sa punoan sa Acacia. (Sumpayan)