Goodbye is not Forever

Gula 9

Alas diyes na sa gabii silang nanggawas sa sinehan. Gihatod ni Albert si Josheba sa ilang pinuy-anan. Nagpakyaw sila’g taxi. Gikan sa balay sa dalaga, milahos na siya sa ila.

Nianang pagkaugma — adlaw’ng Sabado nahiduaw si Eking kang Albert. Katalirongan ni Albert si Eking ug suod silang managhigala hangtod sa dagko na sila. Kun adunay problema si Albert bahin sa relasyon nila ni Josheba ug sa iyang kaugalingon, si Eking gayod ang sunod nga masayod human sa iyang inahan.

Sa sala, nag-atubang ang managhigala. Naatol nga didto sa kusina ang inahan ni Albert niadtong higayona.

“Mora’g nag-Biyernes Santo ang nawong mo karon?” ni Eking nga ingon sa nakamatikod gilayon nga daw sa wala’y kadasig ang panagway ni Albert. “Unsa bay nahitabo, ha Brod?”

Wala motubag si Albert sa gipangutana sa iyang higala. Mitindog hinuon siya. Gidulong ang nahimutangan sa ilang refrigerator. Nagkuha siya’g tulo ka botelyang Colt 45. Iya kining gidala ngadto sa nahimutangan ni Eking.

“Mag-inom ta,” matud ni Albert nga mipahimutang sa tulo ka botelya sa ilimnon sa ibabaw sa lingin nga lamesa. Colt 45 ang ilang imnon, usa sa mga maisog nga matang sa beer.

Gitutokan siya ni Eking. Gisuhid niini ang iyang panagway, sama sa aduna kini gipangita diha kaniya. Nakasabot siya sa tinan-awan ni Eking kaniya. -- Sumpayan pa