Goodbye is not Forever

Gula 5

“Unya, kanus-a ka man mogikan?” mitingog si Albert pagkilab sa pipila ka gutling. Maluyahon ang iyang tingog samtang gitutokan si Josheba sa tinan-awan nga tugob sa kamasinaboton. Apan didto sa iyang kahiladman, dihay nagpanikad nga pagsupak sa kagustohan sa dalaga.

“Daghan pang mga papeles ang akong hikayon una ako makalupad,” mipasabot si Josheba nga ingon sa nalipay pag-ayo nga misugot ang ulitawo. “Hibalo ka na sa proseso karon kun mo-abroad ka. Daghang kuskos-balungos. Apan okey lang. Kun gibuhat kini sa atong kagamhanan, kini alang da usab sa kaayohan ug kaluwasan sa mga Pilipino nga nanimpalad sa gawas sa nasod.”

Wala na motingog si Albert.

Pagkilab sa pipila ka daklit, nanggawas na sila sa restawran. Samtang nagtupad sila nga nanglakaw, mihugot ang pagbalikos sa mga kamot ni Josheba sa bukton ni Albert. Gibati ni Albert ang kalipay nga ingon sa kalit lang mikuyamang sa iyang dughan. Sa makadiyot nawala kadtong kasubo ug kahigwaos nga nanguyapot sa iyang galamhan.

Dugay na nga managtrato sila si Josheba ug Albert. Panagsa ra silang magkalagyo. Kun mahitabo man gani, mga pila lang ka adlaw. Alang nilang duha nga nagkahigugmaay ang usa ka adlaw nga dili sila magkita sama sa usa ka tuig na ang gidugayon. Dili na nila maantos ang kamingaw sa usa’g-usa. -- Sumpayan pa