Tungod sa tugon ni Tatay

Alas singko i media sa buntag. Maoy pag-abot namo sa Poblasyon, Argao. Ako ug ang akong bana nga si Andy, nagsakay sa bag-o namong pinalit nga second hand nga Renegade Jiffy. Siya ang
nagdrayeb. Ug nikuyog ko nga moadto siya sa Regional Trial Court sa Oslob aron pagtambong og bista. Nikuyog ko kay dalang road test sa sakyanan iyang gibuhat ug gusto sab kong maka-sight seeing sa mga lungsod sa habagatang Sugbo.

Alas tres pa sa kaadlawon pagbiya namo sa Canduman, Mandaue diin tua among balay giabangan og bupete sa akong bana nga usa ka abogado. Bag-o lang siyang nakamaong momaneho. Wa pay tuig. Gidungan mi’g tudlo, kaming duha ni Tatay Inting akong amahan nga dugay nang biyudo.

Nagdukaduka pa ming duha pag-abot sa Argao. Unya nikalit siya’g hunong kay may nibabag nga traysikol sa karsada.

Isog og tinan-awan ang drayber sa traysikol ngadto’s akong bana. Si Andy nagtutok lang sa drayber sa traysikol, nga nagduka pa. Nipadayon lang sab ko’s akong pagdukaduka. Ug kay wa na maglihok ang sakyanan, nakatulog ko sa front seat.

Napulo ka tuig na ming minyo sa akong bana. Estudyante pa siya’g abogasya, minyo na mi. Ug may duha na ka anak: Puro lalaki. Si Dante otso anyos. Ug si Daniel sayis anyos. Legal researcher siya ni Atty. Ritche Tibon sa wa pa kapasar sa bar. Pagpasar niya, tulo ka tuig na ang nilabay, gipremyohan siya’g Toyota Corolla ni Atty. Tibon. Nagsuweldo mi og drayber balig duha ka tuig. Dihang nakat-on na si Andy og drayeb, siya nay nangunay sa pagmaneho.

“Pakamatyi imong lugar, Alma!” ni Tatay Inting samtang nagtupad nako sa front seat sa Renegade, usa ka hapon nga gitudloan ko niyang magmaneho. Kuyaw kaayo siyang motudlo sa pagmaneho.

“Pakamatyan!” mao gyud ni iyang expression.

Kay lagi ang iyang gimaneho sa wa pa siya niretiro, mga six by six nga karaang trak nga hauler sa tubo sa Marjorie Farms sa Carmen, Cebu. Isog siya nga di molikay og binanggaay kay dako man iyang trak.

“Bata pa tawon ko Tay. Di pa ko gustong mamatay” tubag nako.

“Kun dako ang trak atong kontra, unya  jiffy lang ang ato, likay gyud ta, bahalag kita’y naas lugar,” dugang nako.

“Bitaw. Komedya ra tong ako. Kun di ka kalusot, ayaw lag pugos,” dugang ni Tatay.

Wa gyud mi nilusot. Nagsige lang tutok ang drayber sa traysikol. Naghuwat nga tulisokon siya’s akong bana. Away diay tuyo sa drayber sa traysikol. Apan dihang may nibusina sa among luyo, nipadayon na lang ang traysikol sa iyang biyahe.

Nakita nako ang drayber sa traysikol nga daw nahibulong nga wa gyud nasuko akong bana. Nipadayon mis among biyahe.

“Bilib ko nimo. Kay di man ka kalusot, wa lang gyud ka nilusot,” nako pa.

“Wa man gyud ko malimot sa tugon ni Tatay,” ni Andy. Ug nagkinataw-anay ming duha.

Dangtag usa ka semana, dihang nakasuroy mi sa Carmen, ako ning gisugilon ang hitabo sa akong mga ig-agaw ug uyoan nga mga haniti nang modrayeb. Puwerte nilang pangatawa.

“Apan maayo gyud nang batasana sa usa ka drayber. Kay di gyud kita’g away sa karsada,” ni Charlie nga akong ig-agaw nga negosyante. (Kataposan)