Pribadong eskuylahan nasudla’g kawatan

Dili pa lang dugay nasudlan ang usa ka mahalong pribadong eskuylahan og propesyonal nga mga kawatan. Mga bata pulos, espoting...mora po’g anak sa dato. Kay kun mosulti, English speaking. Slang pa gyud!

Nahitabo kini buntag. Tinghatod sa mga estudyante sa eskuylahan. Sanglit mga kindergarten ug naa sa elementariya pa man ang gipanghatod, mapugos gyud pagparada ang mga ginikanan sa ilang kotse didto sa bakanteng espasiyo sulod sa tunghaan. Kaso lang, tungod kay naay guwardya nga nagbantay, kompiyansa lang ang mga tag-iya’g sakyanan. Biyaan lang ang nag-andar nga behikulo nga dili i-locked. Dinhi makalugar ang mga batang kawatan.

Mobanos ang mga guwatsinanggo pagsakay sa kotse, diin kun pangutan-on sa guwardiya, kinsa nagduda, fluent kaayo motubag og inenglis. Limpyo ug well-dress up sab ang mga tonto. Mao nga makatuo gyud ang guwardiya nga kauban o anak ra sila sa adunahang parents nga naghatod sa ilang mga estudyante.

Mahibulong na lang ang mga naghatod inig balik nila’g sulod sa kotse, wala na ang ilahang laptap, cellphone, alahas, bag ug uban pang mga mahalong kabtangan. Diay, nahurot na kini’g dala sa nakasibat nang mga batang kawatan.

Gidudahan!! Nga aduna nay grupo karon nga nag-umol og mga propesyonal nga batang kawatan, kinsa mibansay ning mga menor de edad unsaon pagpakaaron-ingnon nga mga anak og dato aron sa paglingla sa mga guwardiya nga nagbantay sa seguridad sulod sa eskuylahan.

Busa, mga ginikanan, tambag lang. Ayaw gyud ninyo’g biyai ang inyong sakyanan nga dili i-locked ang pultahan. Oras nga manaog mo, seguroa nga nayawehan na ang mga palid. Kay bisag ang sulod sa eskuylahan nga giposteha’g mga guwardiya, malutsan lang gihapon sa ilang atubangan og mga kawatan.