Goodbye is not Forever

Gula 1

Kaganina pa silang walay tingganay sukad sa ilang pag-abot. Mao ray pagtingog ni Albert dihang miduol kanila ang usa ka silbidora ug mi-order siya sa ilang pagkaon. Mao ray ilang nahimo ang pagtinutokay ug pagpasiplatay sa usa’g-usa. Wala’y usa kanila nga gilayhan pagsulti. Mora sila’g dili managkaila nga nag-atubang pagpangaon sa usa ka lamesa.

Nagmug-ot ang panagway ni Albert. Mitadlas ang pipila ka kunot sa iyang agtang. Gihasol ang iyang hunahuna bahin sa giingon ni Josheba, iyang hinigugma nga mo-abroad kini. Misinta ang iyang kahiladman. Dako siyang supak sa plano sa dalaga. Kun wala pa sila mag-atubang sa grasya sa kan-anan, tingalig mibuto na siya sa kasuko. Wala gayod siya makauyon sa gilaraw sa iyang hinigugma.

Diyotay ra ang gikaon ni Albert. Miipis siya’g beer diha sa iyang baso. Miyarok. Unya giipisan niya pag-usab ang wala nay sulod nga baso. Sagunson ang iyang pag-inom sa beer.

“Gipakaingon ko bang ordinaryong kinabuhi lang ang imong gipangandoy alang natong duha?” Mao pay pagtingog ni Albert sa nakainom na. “Nganong nakahunahuna ka man pag-abroad nga maayo man unta ang imong trabaho dinhi sa ato?” -- Sumpayan pa