Pungko-pungko - Gula 7

“Asa man ta ron Bert,” nangutana si Lorelie dihang misugod na pagdagan ang gisakyan nilang kotse. “Mag-disco ta,” dali nga tubag ni Robert.

“Sori kaayo Bert, di man ko hilig og disco, dili ko makamao mosayaw,” ni Lorelie. “Kun mao, asa man diay ta ron?” bawos nga pangutana ni Robert.

Gidala ni Robert si Lorelie didto sa matahum na kaayo nga Plaza Independencia. Giparking nila ang sakyanan ug mipasiyo sila sulod sa public plaza. Nanglikod sila ilawom sa kahoy’ng Acasia.

“Hibalo ka Bert, karon maoy labing malipayon nako nga birthday. Wala g’yud ko magdahum nga mahimong bongga ang akong selebrasyon,” migunit si Lorelie sa bukton ni Robert.

Wala motingog si Robert. Hinay niya nga gigunitan ang wala nga kamot ni Lorelie, gipislit-pislit kini ug dayon gihagkan. “Hala? Gihagkan man gud nimo ang akong kamot Bert,” ni Lorelie nga nakalitan.

“Timaan kana sa akong pagmahal nimo Lorelie. Dili na lang ko magliko-liko pa, I love you,” abtik kaayo nga nakapangamural si Robert sa dalaga. Milingi kaniya si Lorelie.

“Ang tinuod, nakat-on na usab ko sa pagmahal nimo Bert. Sa gipakita mo nga kabuotan nako, ang batan-on ko nga kasing-kasing inanay’ng mipitik og paghigugma kanimo,” matud ni Lorelie nga mibai-id kang Bert.

Wala maglangan si Bert, gigakus niya si Lorelie. Halos sangko sa langit ang gibati niya nga kalipay. “Ang ihangyo lang nako nimo Bert, itugyan nako nimo ang akong gugma apan ayaw tawon ko binuangi ug pahilaka,” ni Lorelie.

“Promise, panggaon ko ikaw hangtud sa hangtud,” pasalig ni Robert sa dalaga. “Ayaw isipa nga sayon ra ko nga pagka babaye Bert, apan atol ning akong ika-19 nga birthday, imo na ako,” matud ni Lorelie.

Puno sa kalipay ang mga kasing-kasing nila ni Robert ug Lorelie. Namalik sila sa kotse ug didto sa unang higayon gitilawan ni Robert ang katam-is sa mga ngabil sa dalaga.

Sanglit tinted ang kotse, wala’y kabalaka si Robert nga dunay makakita kanila. Gibuhong niya og mga hawok si Lorelie. “Imo na ako Bert, bahala ka, dad-a ko bisan asa karong gabhiona,” matud ni Lorelie nga nagpiyong ang mga mata.

Nagkainit na ang kalawasan ni Robert samtang wala’y puas sa paghapyod-hapyod sa kalawasan ni Lorelie nga nagsandig kaniya. Gipadagan ni Robert ang kotse paingon sa nahibaw-an niya nga dapit.

“Dili ka magbasol Lorelie, panggaon ko ikaw ug ako na ang mopatungha kanimo. Human sa imong kurso, I hope nga magpakasal ka sa usa ka tindero og pungko-pungko,” matud ni Robert dihang ang kotse misulod na sa Q6 motel.  (Kataposan)