Langgam sa kagabhion - Gula 50

Paglabay sa kapin sa tulo ka bulan sukad sa paggikan sa bana ni Ana paingon sa gawas, ang akong anak mao nay unod sa panglibak sa among dapit. Nabaniog nga nangabit kuno si Ana. Usa ka ahente sa appliances ang gikabit niini. Nagluib si Ana sa bana niyang nagtrabaho sa gawas.

Busa, nagsusi ko kun unsa ka tinuod ang maong tabi-tabi. Ug nasuta ko nga tinuod gayod nga nagluib si Ana sa iyang bana. Ang libak sa among mga silingan nag-ingon nga wala gayo’y mapili sa among pamilya kay ako nga iyang inahan usa ka burikat ug ang akong anak nagluib usab sa iyang bana.

Dihang daw dili na nako maantos ang pagpanglibak sa mga tawo, nakahukom kong badlungon si Ana sa iyang pagpangabit.

Dihang gipakigsultihan ko si Ana bahin sa iyang pagluib sa iyang bana iya na hinuon akong gisumbalik sa pagtulisok.

“Ayaw pagbuot nako! May nawong pud ka nga mosulti nako, no,” niya pa. “Wa kay labot kun unsay akong buhaton sa akong kinabuhi. Ayaw pamadlong kay labaw pa kang badlungon. Ikaw bitaw, di ka man magpabadlong nianang imong pagkaburikat.”

Mora’g nahilis ako sa atubangan ni Ana. Mora ko’g naputlan og dila wala nay gikasulti ngadto kaniya. Nigamay ang akong kaugalingon nga nakig-atubang sa akong anak. Ug naulaw ko sa akong kaugalingon.

Naulaw ako sa gisulti ni Ana. Kay bisan tuod nagbugaw na lang ako, mudawat pa man gihapon ako’g kustomer kun may mga higayon nga may mudaginot pa kanako. -- Tapuson sunod gula