Kalag gihagad og sing-along

Alas sayis sa hapon, adlaw sa kalagkalag. Nagpundok na ang tulo ka managbarkada sa videokehan ni Mr. Darvalo sa baryo Saha. Nagsugod nag inom og beer ug kantakanta sila si Charlie, Armand ug Nonoy. Nakahurot na sila og usa ka family size nga Red Horse. Unya tua pay duha ka botelya nga wala lang una gipagawas.

Gipabugnaw pa sa freezer sa refrigerator ni Mr. Darvalo. Nag-round robin sila sa mikropono. Unang nikanta si Charlie og “One In A million You.” Sunod si Armand, nikanta og “Suddenly.” Dayon si Nonoy, nikanta og “Nais Ko.”

Gibutang ni Nonoy ang mikropono sa lamesa human niya’g kanta. Unya nipasahe ang Born Free paboritong awit ni Dante nga usa ka tuig nang nitaliwan. Barkada nila si Dante sa buhi pa. Namatay sa cancer.

Sa ilang nahibaw-an, ang hinungdang nasakit og cancer si Dante, kay nagpabutang og bolitas sa iyang kinatawo. Ulitawo pa silang upat ka managbarkada. Giduaw nilas menteryo ang lubong ni Dante ganihang sayong hapon.

“Kinsa may nag-program anang kantaha?” ni Armand.

“Ako. Nalimot diay mo nga ako mang gihagad si Dante nga magkantahanay karon?” ni Charlie.

Nahilom ang duha. Ug nanigang mga mata. Unya nilihok ang mikropono kay daw gibira og di makita nga mga kamot. Nanagan sila’s Armand ug Nonoy. Nagpabilin si Charlie. Ug nitutok pag-ayo sa mikropono kun asa padulong. Kay gibarogan man gyud niya ang imbitasyon sa higala.

Sa buhi pa, si Dante ang kinamaayohang mokanta nilang upat. Nindot og tingog si Dante ug makakanta bisa’g unsang kanta basta di lang rock and roll. Mga standard iyang ganahang kantahon ug tibook siya’g tingog. Kaya niya ang mga kanta nilang Pat Boone, Vic Damone, Jerry Vale, Frank Sinatra, Johnny Mathis, Tony Bennet, Mat Monro, Engelbert Humperdinck, Tom Jones, Andy Williams, Perry Como ug Jack Jones. Mokanta sab siya’g mga Binisaya ug Tagalog nga mga kanta. Kamao sab siya’s mga kanta ni Eddie Peregrina ug Victor Wood.

Nipahinungod ang mga barkada og pipila ka pulong sa pag-ampo alang sa ilang higala. Nagdala si Charlie og buwak. Si Armand nagdala og mga kandila. Gidagkotan nila. Ug gipangadyean ang nitso ni Dante. Unya pagkataudtaod, nakita nila ang mga ginikanan ug igsoon ni Dante, nga nagdangadanga.

Nidalikyat og panamilit si Charlie. Di man tarong og tinagdan ang pamilya ni Dante sa iyang mga barkada. Kay sila ang gibasol sa nahiaguman ni Dante.

Unang nipalayo sa nitso sa higala sila’s Nonoy ug Armand. Pagdayong biya ni Charlie nakighinabi pa gyud siya ni Dante nga daw buhi pa sa iyang hunahuna. “Huwaton ka namo sa videokehan sa ilang Mr. Darvalo. Kay mag-sing-along ta. Gimingaw na ko’s imong tingog.

Maghuwat mi nimo gikan sa alas sayis ngadto sa alas otso sa gabii” ni Charlie nga nagtutok pag-ayo sa lapida diin napatik ang ngalan sa namatay, petsang natawhan ug petsa’s pagkamatay. Daw naghulat siya nga motubag ang patay. Dihang tataw na kaayo niya ang mga hait nga mga tinan-awan sa ginikanan ug mga igsoon ni Dante, nagdali si Charlie nga nibiya.

“Kuyawa god anang imong gibuhat” ni Nonoy ngadtong Charlie dihang nakaapas na siya sa duha.

“Kun mobalik gyud si Dante unya makigkantahanay nato, di ka mahadlok?” ni Armand.

“Nganong mahadlok man? Mausab diay atong relasyon. Amigo nato siya sa lawasnon pa. Kun kalag na siya, amigo tingale gihapon nato,” ni Charlie. Nitutok sa duha ka higala.

“Maayo kay wa gyud nimo pakyasa akong imbitasyon, Dan” ni Charlie. Nikanga kay gikulbaan kun unsa gyuy mahitabo ning pagbalik sa iyang higala. Gisundan niya’g tan-aw ang mikropono nga nag-atras ug hapit na mahulog sa lamesa. Nitindog siya ug nipaduol sa mikropono kay kun mohanag kahulog, iya na lang saw-on.

Unya nahulog gyud ang mikropno kay duna may nibira niini nga dili makita. Gidali ni Charlie og sawo ang mikropono. Unya kanunay lang gihapon nga gibira. May nibira sa wire sa mikropono. Ug gilili gyud niya ang videoke. Giduwaan diay sa tres anyos nga anak ni Mr. Darvalo ang wire sa mikropono. Gikalingawan og bira ni Jimmy ang wire sa mikropono samtang nagpahipi ilawom sa lamesa duol sa videoke. Ang-ang maglagot o makatawa si Charlie. Wa gyud diay patay nga mobalik. (Katapusan)