Ang bagyong Ofel - Gula 7

“Maabtan gani ta nilang Papa ug Mama, bantay g’yud ka,” matud ni Joy dihang didto na sila sa sulod. Wala tuod maglangan og higayon si Arnel, gikupogan dayon niya si Joy pinaagi sa makabuang nga romansa.

Misukol si Joy sa pagparayganay. Wala gayud sila makapugong sa kainit sa ilang mga pagbati ug wala na makabalibad si Joy dihang gitagsa-tagsa paghukas ni Arnel ang mga salimbong sa iyang kalawasan.

Daw nag-abot ang gininhawa ni Arnel tungod sa naghingapin nga kahinam nga maangkon na niya si Joy. Tuod paspas ang pagkilab sa mga yugto ug dungan nila nga gisaw-an ang kalami sa pagparayganay.

Igo lang gayud sila nga nahuman sa ilang gihimo, nakadungog sila nga dunay tingog nga nagsultihanay didto sa sala. “Hala…naabot na sila si Papa, iya ro’ng tingog,” hagawhaw ni Joy kang Arnel.

“Patay…tua ra ba sa sala ang akong bag ug ang jacket, makit-an to karon nila,” tubag-hagaw ni Arnel. Pareho sila nga nagdali-dali sa pagsul-ob sa ilang mga sapot, apan nadungog na nila ang tuktok sa pultahan gikan sa gawas.

“Joy! Ablihi ning pultahan, dugay ba nimo nga nauli gikan sa dagat, wala ka lang gani mananghid nako. Ablihi ning pultahan! Kinsa ba kining bag nga dia sa sala?” matud sa amahan.

Dugay nga nakatingog si Joy. Wala siya masayod kun unsay buhaton. “Ayaw’g dugaya’g abli kining pultahan!” singgaak sa amahan nga nakamatikod na nga may kauban ang iyang anak sa sulod sa kwarto.

Walay nahimo si Joy, gibuksan ang pultahan ug pareho kini nga nagduko ug si Arnel.

“Nag-unsa mo dinhi?” singgaak na usab sa tingog sa amahan ni Joy. Nakasabot na ang amahan nga may dautang nahitabo na sa iyang anak ug sa lalaki nga kauban niini sa lawak.

“Paabuton ko kamong duha sa sala,” bug-at ang tingog sa amahan. Didto sa sala sa balay, walay tingog nga miatubang sila si Joy ug Arnel sa masuk-anong amahan sa dalaga. Diha usab ang inahan niini nga nagyawyaw.

“Dong, kay sigurado man ko nga may nahitabo na kaninyong duha, awhag lang nako nimo nga tubaga ang imong obligasyon,” giingnan si Arnel sa amahan ni Joy. “Yes, nong. Ayaw kabalaka, love man ‘sab g’yud nako si Joy. Pakaslan nako siya.”

Tuod, liwas sa Kalag-Kalag miadto sa balay nila ni Joy ang mga ginikanan ni Arnel ug gikasabotan ang kasal sa maghigugmaay. “Wala ka ba magmahay?” gisukna ni Joy si Arnel. “Wala uy, nganong magmahay man ko, nagpasalamat pa gani ko sa bagyo’ng Ofel,” ni Arnel pa.

Nagkataw-anay silang duha. (Kataposan)