Mamugos gyud

Dear Tita Salie,

Have a wonderful day. I hope that you are in good health always. Usa ko sa mga nagsunod sa imong lindog. Pero sa kadaghan na sa akong nabasa wala pa gyu’y natukma ug susama sa akong gihambin karon nga suliran.

Tagoa lang ko ug Ms. Aries, usa ko ka minyo ug usa ka career woman. Yes, nagtrabaho ko aron makatabang ko sa akong bana alang sa among mga panginahanglan ug mga gastohanan sa among mga anak.

Ang akong problema mahitungod sa akong bana. Higal kaayo, tita, ug gusto kaayo nga makig-sex kanako bisan lapoy kaayo ang akong kalawasan tungod lagi kay gikan usab ako sa trabaho. Kapoy na gyud daan inig out nako sa trabaho unya inig uli nako sa balay naa pa ang akong bana nga gusto usab magpaserbisyo. Ug ang nakapait kay dili siya modawat og balibad. Kinahanglan nga inig hangyo niya andam ka gyud kanunay mohatag sa iyang gipangayo. Kay kun ako siyang balibaran iya man dayon ko nga himoan og estorya nga duna koy laing lalaki mao nga nawad-an nako og gana ngadto kaniya.

Unsa may angay nakong buhaton, Tita? Dili ba gyud puwede nga mobalibad ta sa atong bana? Palihog pasabta ko. Daghang salamat sa imong pagtagad. God bless you always.

* * *

Dearest Ms. Aries,

Lisod gyud kaayo ang kinabuhi sa usa ka inahan, asawa unya career woman pa. Dili gyud lalim kun ikaw nga asawa nagtrabaho pa kay inig-abot sa balay aduna kay mga anak nga atimanon, andaman pa og pagkaon. Mag-andam ka pa alang sa trabaho pagkaugma, mag-andam sa imong uniform, uniform sa bana ug uniform pa sa imong mga estudyante.

Wala kay pahulay, unya anaa pay bana nga magsige og pangablit kay gusto nga mo-score. Mas mosamot gyud nga maluya ka kay masuko man kun imong balibaran. Pero imo siyang bana ug duna kay responsibilidad kaniya.

Ang kinabuhi nga ingon niini lisod gyud kun dili kamo kamao modala. Busa nagkinahanglan gyud nga open mo sa usa’g-usa. Kinahanglan nga masayran sa imong bana nga halos dili na nimo kaya ang kakapoy. Ayaw agwantaha ang tanan kay ma-stressed ka.

Dapat imo siyang sultihan aron inyong sabotan. Kun puyde imo siyang pasabton ug imong hangyoon nga weekend ka na lang mobayad sa imong obligasyon kay condition ka nianang panahona. Ang kulang lamang kanimo mao ang pagpasabot kaniya. Parayge lang siya permi aron ma-develop ninyo ang pagsinabtanay sa usa’g-usa.

-- Tita Salie