Mipakpak ug mihugyaw ang mga barkada nila ni Arnel ug Joy kay nakit-an g’yud nila nga gihagkan sa ulitawo ang brand new niya nga girlfriend.
“Kamo ha,” nagngisi si Joy nga milingi sa iyang mga barkada. Hinay sila nga misibog si Arnel ug Joy sa nahimutangan sa ilang mga barkada. “Angayan g’yud kaayo mo pareson day,” giingnan si Joy sa babaye nga kauban nila sa grupo.
Karon pa makabantay si Joy ug Arnel nga ang ilang mga kauban sa grupo nagpares-pares diay. Nasabtan ni Joy nga tagsa-tagsa diay og sweetheart ang iyang mga kauban. Wala diay siya masayop pagsugot ni Arnel kay siya ra ang walay partner.
Taud-taud, naglagyo-ay ang magbarkada. Mora’g nangita’g lugar nga magkaparayganay sila ug sa ilang mga hinigugma. Sila si Joy ug Arnel didto mipaduol sa ilawom sa dakung bato. Distansya sila og mga tulo ka dupa ug sa lain nila nga barkada.
Anam-anam nga nagpagakus na si Joy kang Arnel samtang anaa sila ilawom sa tubig. Wala makasabut si Arnel sa iyang gibati samtang migakus sa hawakan nga bahin ni Joy. Nakabantay si Arnel nga dunay bato nga diha duol kanila.
Tukma kaayo kay samtang misuway siya paglingkud, taga dughan ang tubig. “Dali Joy manglingkud ta niining bato,” iyang giingnan si Joy. Mitupad kaniya si Joy ug mihana sa paglingkud apan dunay daku-daku nga bawod nga mihapak.
Wala tuyoa nga nalagpot si Joy ug didto mapalingkud kang Arnel. Nahayang ang ulitawo. Dali sila nga mibangon ug nangatawa. Mibalik sila sa paglingkud sa dakung bato nga taga dughan ang tubig.
Matag karon ug unya, samtang naglingkud sila sa bato daw alsahon ang ilang samput sa tubig kun mohapak na ang bawod. Magsige sila’g pangatawa.
“Kamalipayon nato Arnel uy. Maayo unta og walay kagul-anan ang atong relasyon sahi sa kanunay nako madunggan sa ubang mag-sweetheart. Ikaw ha, sige na lang og gakus nako,” ni Joy pa nga nagngisi.
Gitutokan ni Arnel si Joy kang kansang panagway nadan-agan sa silaw gikan sa buwan. Nagtinutokay silang duha ug takulahaw lang nga anam-anam nga nag-abut ang masi’g nila ka mga ngabil.
Gigakus pag-ayo ni Arnel si Joy. Dili masabut ang pagbati ni Arnel samtang gibatyag niya ang kalalim nga gibalikisan sa iyang mga bukton ang lumoy kaayo nga lawas sa dalaga. “I love you Joy.” “Mahal ‘sab tika Arnel.”
Nag-ukobay na usab ang ilang mga ngabil. Gabii na nga namauli ang mga barkada ug gihatud ni Arnel si Joy sa ilang panimalay. (Sumpayan)