Maoy nakauna

Dear Tita Salie,

Maayong adlaw kanimo. Kanunay gyod ko nga magbasahan sa imong lindog. Bisan diri sa akong gitrabahoan mopalit gyod ko og Banat News aron duna ko’y kalingawan og basa.

Tawaga lang ko og Mr. RB, 40 plus na ang akong pangidaron, usa ka minyo ug duna nay mga anak. Ang akong problema, Tita, kay nauyab nako ang secretary sa akong boss nga usa ka dalaga, nagpangidaron pa lang siya og 20 anyos. Duha na ka tuig ang among relasyon ug ako gyod ang nakakuha kaniya pag-una.

Love kaayo ko niining bayhana, Tita, bisan pa man kun ako siyang gisultihan nga duna na ko’y mga anak ug anaa ang akong asawa. Dili na man siya mosugot nga hunongon ang among relasyon. Ug karon mora og nahigugma na sad raba ko pag-ayo niya. Kun ako siyang sultihan nga magbulag na lang mi tungod kay wala man gyod padulngan ang among relasyon igo ra gyod siyang mohilak, Tita.

Maluoy man gyod ko sa akong asawa, Tita Salie, kay wala gyod siya masayod nga duna ko’y kabit tungod kay bisi man usab siya kaayo.

Unsa may angay nakong buhaton? Palihog pasabta ko. Daghang salamat sa imong pagtagad. More power and God bless you always.

-- Mr. RB.

* * *

Maayong adlaw usab, Mr. RB,

Ayaw intawon gub-a ang mga pangandoy sa imong mga anak ug ang inyong pamilya tungod sa imong pagpakigrelasyon anang batan-on.

May be tinuod nga mas maayo ang batan-on kun lawasnong kalipay ang atong hisgutan. Kun imong rang kalipay ang atong tan-awon makaingon kita suwerte ka kay nakailad ka pa og bata-bata pa.

Pero kun atong tan-awon ang kinatibuk-an daghan gyod ang maangin sa imong gibuhat. Daghan ang mga biktima ug mga matang luhaan tungod sa imong selfish nga binuhatan. Una imong maguba ang pagkatawo sa imong uyab tungod kay minyo kana ug dili na gyod mahimo nga minyoan nimo siya. Imong giguba ang iyang pagkatawo tungod kay imong gikutlo ang iyang kaputli nga dili unta ikaw ang gigahinan niini.

Luoy usab ang imong mga anak kun mabungkag ang inyong pamilya. Wala sila’y gilauman kun dili ikaw nga ilang amahan. Luoy ang imong asawa nga naningkamot usab aron makatabang kanimo pag-alaga sa inyong pamilya. Posible usab nga mawad-an ka og trabaho kun mahibaw-an ang imong binuang.

Busa undanga ninyo ang maong buhat, samtang dili pa dako og kadaut nga nahimo kaninyo ug sa mga tawo nga inyong gimahal.

-- Tita Salie