Ang bagyo’ng Ofel

Sayo kaayo nga nagpa-enrol si Jocelyn sa usa ka unibersidad dinhi sa dakbayan sa Sugbo kay gituyo niya kini aron makapili siya og maayo nga oras sa iyang klase. Taga Bohol si Jocelyn nga anaa na sa ika-upat ka tuig sa kurso nga engineering.

Migikan siya og buntag sa Bohol ug mobalik ra usab unta dayon inigka-hapon human sa iyang pagpa-enrol apan naabtan si Jocelyn og dili maayong panahon kay gideklarar na nga Signal No. 1 ang Sugbo ug Bohol tungod sa bagyo nga Ofel.

Didto na unta siya sa pantalan kay mopauli apan wala nay mga barko nga gipalarga ang Coast Guard paingon sa Bohol. Apil si Jocelyn sa mga na-stranded nga pasahero diha sa pantalan.

Naguol si Jocelyn kay kuwang ang iyang kwarta tungod kay daku-daku man ang iyang nabayran sa tunghaan. Nabatasan man gud sa mga ginikanan ni Jocelyn nga daku ang ibayad sa enrolment pa lang aron gagmay na lang ang binuwan nga bayranan.

Dunay mga TV reporters sa ABS-CBN ug sa GMA 7 nga miabut ug nanginterbyu sa mga tawo nga na-stranded. Usa gani unta si Jocelyn nga giduol sa reporter aron interbyuhon apan mibalibad siya kay mauwaw.

“Nagpa-interbyu unta ka para makita ka sa TV unyang hapon,” giingnan si Jocelyn sa usa ka batan-ong lalaki nga nagngisi nga miduol kaniya. “Mauwaw ko uy, ikaw lang,” dali nga tubag ni Jocelyn. Kadto maoy sinugdanan nga sila nagkahigalaay.

Nagpaila ang lalaki kang Jocelyn nga siya si Arnel. Nagpaila usab si Jocelyn sa angga nga Joy. Nakigdungan si Arnel kang Joy sa pagpangaon og barbecue sa gawas sa pantalan.

Bugnaw kaayo ang hangin sa pantalan nga giubanan og panagsa nga habo-habo. Gitanyagan ni Arnel si Joy nga isuot ang iyang jacket. Pareho sila nga mopaingon sa Bohol kay si Arnel nagpuyo man usab sa Tagbilaran.

Human sila makakaon, mibalik sila sa waiting area sa shipping company ug wala na gayud magbuwag. Nalingaw na lang usab sila si Joy ug Arnel kay dali ra kaayo sila nga nagkabarkada.

Nakabantay si Joy nga nakagusto kaniya si Arnel tungod sa iyang mga linihokan. Ingon sa mapinanggaon kaayo si Arnel kaniya. “Maayo gani kay nagkaila ta Arnel, kun wala pa magmingaw unta ko nga walay kaestorya,” matud ni Joy.

“Ako ‘sab nagpasalamat nga nagkaila ta kay dili boring ang akong pagpaabut nga molurang ang bagyo’ng Ofel. Tana, manginom ta’g coffee sa canteen aron mainitan ang atong tiyan,” ni Arnel nga sa unang higayon migunit sa kamot ni Joy. (Sumpayan)