Gwapa nga singer Gula 7

Tungod sa pagpasaka og kaso ni Myra nga Sexual Harassment batok sa ilang overall manager nga taga Manila, natinuod ang iyang kahadlok – gitaktak siya sa trabaho.

Gitabangan si Myra ni Dario sa pagpasaka’g reklamo didto sa Department of Labor and Employment (DOLE). Usa ka adlaw, nakadawat og suwat si Myra gikan sa presidente sa ilang kompaniya ug gusto kini nga makigkita kaniya sa opisina.

Didto nasayran ni Myra nga kadtong overall manager sa kompaniya nga mihagad kaniya og deyt ug maoy mimando sa pagpataktak niya sa trabaho, gitangtang na usab sa iyang pwesto nga walay nadawat nga benepisyo.

Diha ang gitaktak nga overall manager nga nangayo kaniya’g pasaylo. Gitanyagan si Myra nga sitolon ang kaso ug hatagan siya og daku-daku nga kantidad bugti sa pagsibog niya sa kaso didto sa DOLE ug sa fiskaliya.

Ang presidente sa kompaniya miagni usab ni Myra nga mobalik sa pagtrabaho isip mao na ang hepe  sa promotional department. Tuod, wala magduha-duha si Myra pagtangdo sa tanyag kaniya nga promotion.

Nag-ukon-ukon hinoon siya pagdawat sa P100,000 nga gitanyag sa gitaktak nga overall manager bugti sa pagsibog niya sa Sexual Harassment case. Apan nakombinsir ra siya sa ilang presidente nga dawaton na lang.

Nahinangop kaayo si Dario pagkasayud nga nasitol na ang problema sa iyang girlfriend. Gitug-anan niya si Myra nga miadto siya sa simbahan ganinang buntag ug nag-ampo nga masulbad na unta ang kaso ni Myra.

“Nasayran na g’yud nako Myr nga gimahal ko nimo kay kun wala pa, misugot ka g’yud unta nga makigdeyt sa inyong overall manager. Gusto ko Myr nga magpakasal na ta aron duna sa’y ilhon nga daddy si Lynlyn,” giingnan ni Dario si Myra.

Napagakus si Myra kang Dario tungod sa kalipay nga nadungog niya ang gisulti ni Dario. Nag-ukobay dayon ang masi’g nila ka mga ngabil sa usa ka matam-is nga pagminahalay. “Natulog na ba si Lynlyn?” gisukna ni Dario ang iyang girlfriend.

“”Natulog na. Ngano man, lain na usab nang naa sa imong huna-huna no?” ni Myra pa nga nagngisi. Subli na usab sila nga nagparayganay si Dario ug Myra. Hangtud nga giaswat niya ang iyang girlfriend ug gibutang sa higdaanan.

Gipawong dayon ni Dario ang suga sa kwarto. “Bi tan-awon nako kun tinuod ka ba g’yud nga singer,” matud ni Dario nga nakapaagik-ik kaayo ni Myra nga nakasabut sa iyang gisulti. (Kataposan)