Gugmang matuod

Gula 7

Nagkasuod gayud pag-ayo si Melody ug Raffy dungan sa pagpanglabay sa mga adlaw sa pag-estar sa ulitawo sa dapit sa dalaga.

Gikahinangop usab sa hilom sa magtiayong Ason ug Isko nga mipuyo sa ilang balay si Raffy kay maghatagan man og kuwarta kanila ang ulitawo.

Wala gayud motug-an si Raffy kanila nga anak siya og arang-arangan sa dakbayan ug igo lang nag-adventure sa probinsya.

Miabot gayud ang higayon nga nagkahigugmaay sila si Raffy ug Melody. Gisugot ni Melody si Raffy dihang namisita kini kaniya usa ka gabii nga buwanon ang kagabhion.

Daghan nang higayon nga nag-antos si Raffy pinaagi sa pag-uban ni Melody nga magbugwal sa ilang uma. Naluthan gani ang iyang palad kay wala maanad sa paggunit og guna.

“Ngano diay nga miabot ka man dinhi sa among lugar Raff," gisukna sa dalaga si Raffy usa ka higayon samtang nagdungan sila’g kaon ilawom sa landong sa kahoy gikan nga nag-ugmad sa uma.

Napugos si Raffy sa pagtug-an. “Gipangita ko ang babaye nga tinuod nga magmahal nako nga gusto nako nga maoy ikauban sa tibuok kong kinabuhi,” gitubag ni Raffy si Melody.

“Unya, nakakita ka na?” hinay ang tingog sa dalaga. “Of course, nakita na nako siya diha kanimo Melody,” wala magduha-duha si Raffy sa pagtubag.

Human sa ilang pagpangaon. “Ipananghid tika nila ni Papa ug Mama nimo nga isuroy tika ugma sa siyudad Mel, tabangi ko’g hangyo kanila,” ni Raffy pa. “Tinuod ka Raff? Wa pa ra ba g'yud ko makaadto’g syudad,” matud ni Melody.

Tuod, wala mobalibad ang mga ginikanan ni Melody. “Sige, total may buot ka na man Melody ikaw ang mag-igo. Ayaw kaayo mo pagdugay didto sa siyudad dong Raffy,” matud sa inahan ni Melody.

Buntag sayo sila migikan og udto na sila nga miabot sa siyudad. Diritso nga gidala ni Raffy si Melody sa ilang balay sa Guadalupe. “Hala kadako diay sa inyong balay Raff, dato man diay mo,” ni Melody pa nga medyo nauwaw.

Wala ang mga ginikanan ni Raffy sa iyang pag-abot. Silang duha ra didto sa taas. “Sugot ka og magminyo tang duha?” giingnan ni Raffy si Melody. Pahiyom ang gitubag sa dalaga.

Sa unang higayon nahagkan ni Raffy si Melody. Tam-is kaayo ang ilang pagparayganay. Nabatyagan ni Raffy nga mihangos si Melody. Giagbayan ni Raffy si Melody paingon sa iyang kwarto ug didto gipadayon ang ilang pagparayganay.

“Ikaw Melody ang babaye nga akong gidamgo nga akong gustong ikauban sa tibuok kong kinabuhi.” “I love you Raffy,” tubag ni Melody nga mitugyan sa iyang kaugalingon sa iyang boyfriend. (Kataposan)