Takdol ang bulan lalawigan sa Sugbo

Kay takdol ang bulan, nagkapundok na usab ang mga bata nga katalirungan ni Suzette didto sa ilang natad. Magdula na sab sila. Diha sila’s Ivy, Lea, Titords, Titing ug Dondon. Parehas silang tanan nga mitungtong na sa nuybe anyos ug managklasmet sa Grade Three sa primaryang publikong eskuylahan sa ilang baryo sa Kanturatoy.

“Hayag na sab ang bulan! Takdol ang bulan! Karon, magdula na sab ta!” nagpahiyom si Suzette nga mihangad sa takdol nga bulan.

“Bitaw! Hayag kaayo ang gabii....!” ni Ivy nga mitudlo sa tibuok palibot.

“Yahooo! Dula na sab ta...!” misinggit si Lea nga milingi sa mga batang lalaki nga ikadula niadtong gabhiona.

“Unsang dulaa ang atong ipahigayon ron...?” mitimang si Titords nga mikulitog sa iyang kugmo sa ilong.

“Kanang alegre nga dula...!” dason ni Titing nga nagpangalot sa kutuon niyang buhok.

“Nindot nga tago-tago ang atong dulaon ron...!” nagngisi nga misugyot si Dondon ug naklaro ang pangag niyang ngipon.

Nagdungan paghugyaw ang kabataan.

“Yipeeee! Sige, magdula tag tago-tago....!”

Unya, nagsampara dayon sila si Suzette, Ivy, Lea, Titords, Titing ug Dondon. Sa tanan nga nagsampara, napilde si Dondon. Mipiyong dayon siya ug miihap og napulo aron makatago ang kadulang kabataan nga usa-usahon niya sa pagpangita.

“Sige, panago na mo! Usa .... duha .... tulo ... upat .... lima .... unom ... pito.... walo .... siyam ... napulo!”

Ug gisugdan dayon sa pagpangita ni Dondon ang nanagong mga kadulang bata sa nagkalainlaing punoan sa mga mesitas ubos sa kahayag sa takdol nga bulan.

“Dakpan, Ivy....!”

“Aha, si Titing....!”

“Sakspan, Suzette....!”

“Opps, si Titords...!”

“Di ka kaikyas, Lea...!”

Unya si Ivy na usab ang mipiyong sa iyang mga mata ug nanago na usab ang kadulang kabataan, lakip na si Dondon. Miihap usab si Ivy hangtod sa napulo. Gitagsatagsa dayon niya sa pagpangita ang kadulang kabataan nga nanago sa punoan sa bombil, antuwanga, santan, kalachuche ug san francisco. Sadya kaayo silang tanan niadtong gabhiona nga nagpulipuli sa pagpangita diha sa dula nilang tago-tago, nga gidan-agan sa kahayag sa takdol nga bulan. Dihang lawom na ang gabii, misulti dayon si Suzette sa mga kadula.

“Sige, ugma na sab ta magdula! Oras na aron ta mangatuog...”

Ug nagdungan pagsinggit ang kabataan.

“Tana, mangatulog na ta! Gitawag na tas atong mga mama...!” (Kataposan)