RH Bill angay gyung pugngan

Banawa, Cebu City

May mi-leak nga balita nga gihulga ang mga kongresista sa Malakanyang nga dili hatagan sa Priority Development Assistance Fund (PDAF) kun dili moboto pabor sa RH Bill. Mao sab kuno kini ang epektibong taktika nga sa hilom maoy gigamit sa Malakanyang aron ma-impeached si kanhi Hepe Mahistrado Renato Corona, kinsa gipasanginla’g korap ug itoy-itoy ni kanhi Pres. Gloria Macapagal-Arroyo. Kun tinuod man ugaling, pagkalaksot na baya sa pangagamhanan sa Pilipinas.

Angay’ng hinumdoman: Nga kanang tanang kuwarta nga anaa sa panudlanan sa gobiyerno gikan na sa katawhan. Mao na ang mga buhis nga gibayaran nato dili lang didto sa City Hall ug BIR; kun dili, lakip na sa bisan unsang butanga (makaon man, o dili) nga atong gipalit, diin igo lang gipatong ngadto sa presyo sa ilang produkto ang buhis nga iyaha unta sa mga negosyante. Busa, kita lang gihapoy nabuktot sa bayranan.

Sa laktod, kanang minilyong pundo sa PDAF, ato na! Angayan lang nga ibalik kini sa katawhan pinaagi sa pagpanday’g proyekto nga kapahimuslan sa tanan. Unya, nganong gamiton man ni sa Malakanyang isip hait nga hinagiban nga ipanghadlok sa mga kongresista? Nganong dili man ni ihatag nila kun mosupak sila sa RH Bill, nga dili man Malakanyang ang tag-iya niining kuwartaha? Sa mga tawo man ni? Mao ba kini ang ‘Matuwid na daan’ nga gipasiatab ni PNoy?

Delikado baya kining gihimo sa Malakanyang kun pasagdan lang. Basig magpatuyang na lang sila unsay ilang gusto? Basig, human unya ining RH Bill, magtukod na pud sila’g balaod nga mag-legalize sa kurapsiyon. Ang labing sakit, kun hasta ang kasong patay himuon na nilang legal. Kay gani, kining RH Bill, balaod man kini sa pagpatay sa bag-ong kinabuhi nga umolon na unta sa Ginoo diha sa sabakan sa usa ka inahan. Ay, pagkakuyaw!

Mga kongresista, sayod ang katawhan nga kadaghanan ninyo mga Katoliko. Kun magkahiusa lang mo pagbotar supak sa RH Bill, dili gyud ni mahimong balaod. Samot na, kun ang ubang laing tinuhoan, mokuyog usab. Intawon, mga magbabalaod dinhi sa yuta, ayaw ibaligya ang Ginoo bugti sa PDAF nga maoy gigamit ni Hudas sa paghaylo ninyo. Ay’g kabalaka’g wa moy PDAF. Kaantigo ra moantos ang mga tawo. Basta mao lay mudaog ang balaod sa atong Magbubuhat. Ug dili ang RH Bill nga iyaha sa Yawa.

Timan-i: Nga ang kalipay nga ikadulot sa salapi kadali ra kaayo. Apan ang kalipay nga espirituhanon magpabiling buhi sa kasingkasing sa kahangtoran. Ayaw ibaligya ni Satanas ang inyong katungod sa pagbotar. Paminawa ang Diyosnong awhag sa inyong konsensiya. Ibasura ang RH Bill.