Sa pag-jogging ni Enguelberto

Alas 4:45 sa kaadlawon. Mangiob pa ang palibot sa pag-jogging ni Enguelberto sa karsadahan karon. Gituyo niya kini kay presko pa ang hangin niining mga taknaa. Wala pa kaayo’y sakyanan nga magdagan nga mobuga og aso sa ilang tambutso, kung masingo nimo ang baho makaubo.

Ang hangin bugnaw-bugnaw nga midapat sa iyang panit, nawong ug kalimutaw nga sa matag karon ug unya iyang tunlon, naghatag kaproksay sa iyang baga sa ilawom. Umaabot na man gud ang kapaskohon. Maoy pagsud sa unang adlaw sa Disyembre.

Ganahan pud siya motan-aw sa palibot niining mga orasa diin ang mga kabalayan mingaw pa kay nangatug pa sa malinawon ang matag pamilya. Dili pa niya madungog ang mga kasaba sama sa giatay! animal! peste kang yawaa ka! nga gamiton pagyawyaw sa mga bana’g asawa, nga way malung-ag rong buntaga kay nahurot og pusta sa sugal ang kwarta.

Ang bugtong madungog ni Enguelberto karon, mga tingog lang sa mananap sama sa moo! sa baka, tuktugaok! sa manok ug twit-twiti-twit! sa mga early birds catches worms.

Tungod sa kakutas pagdinagan og lima ka kilometro, naglakaw na lang siya about face pauli sa ila. Niining paagiha misutoy ang kahayag. Hiapsan siya sa paspas nga pag-guho sa adlaw gumikan sa gihabol niini nga mga panganod ug gipang-iwagan ang mga kabukiran, kakahoyan, kadagatan ug ang gisubay niya nga dalan.

Niining tungora, nakita niya ang nagkalain-laing mga basura; kaha ug upos sa sigarilyo, putos mga junk foods ug candies, mga trapo nga lingin sa sakyanan, putos sa sinuka, patay nga iro ug uban pa. Ah! ahh! ahaka ning mga tawhana! pataka’g labay sa ilang mga basura! pagka-way buot! Miutong si Enguelberto, nanampong sa iyang baba ug ilong. Midagan. Misiga iyang mga mata. Gikulbaan siya sa iyang nakita. Usa ka kinumot nga papel de bangko nga may hitsura ni Ninoy Aquino. Iya dayon kining gipunit ug gisud sa bulsa, dayong katawa “Pagka-wa gyu’y buot mga tawhana, pataka lang gyu’g labay sa ilang mga basura.”

Samtang girombo niya ang usa ka bakery nga nagpatukar og “Kasadya Ning Takna-a” mamalit siya’g init nga pandesal alang sa iyang minahal nga asawa ug mga anak nga bata pa. (Katapusan)