Mahadlok mahibaw-an

Dear Tita Salie,

Have a wonderful day. Just call me Josua, from Opon, usa ka amahan apan dili pa hingpit nga bana tungod kay nag-live in pa lang kami ug wala pa makasal.

Tungod lagi kay may anak na kami ug alang kanako minyo na gyod ko bisan pa man kun dili pa kasado. Mao nga gusto gyod nakong maestorya ang mga ginikanan niining akong partner. Gusto nako nga makaila ug mailhan usab ako nila kay ako man ang bana sa ilang anak ug amahan sa ilang apo.

Apan kining akong partner dili mosugot nga magkaestorya mi sa iyang mga ginikanan. Nangayo ko niya og cellphone number aron bisan sa text lang magpaila ko nila apan dili gihapon siya mosugot.

Karon nagduda na hinuon ko niining akong partner, Tita. Ug maoy misantop sa akong hunahuna nga dunay sekreto kining akong partner ug mahadlok siya nga akong mahibaw-an ang iyang tinagoan didto sa ilaha. Sakto kaha ko sa akong pangagpas, Tita? Love baya unta nako kining akong partner ug dili ko gusto nga masakitan ko ug dili ko gusto nga magkabulag mi.

Palihog pasabta ko kun unsay akong buhaton. Thank you very much and more power. -- Josua

* * *

Hello, Josua,

Natural lamang kana nga bation ka’g pagduda tungod kay nagdumili man siya sa inyong maayong tumong. Ang tinuod nga lalaki andam gyod moatubang sa ginikanan sa babaye nga ilang gihigugma bisan pa man kun suko kaayo ang ginikanan sa iyang hinigugma. Isip respeto ug pagtahod sa ginikanan kinahanglan gyod nga mopaila ka kanila tungod kay ila mang anak ang imong gihigugma.

Tinuod nga natural ang magduda nga dunay sekreto ang imong partner. Apan dili usab maayo kun maghunahuna ka og daotan nga rason sa iyang pagdumili nga imong ikasulti ang iyang mga ginikanan. Ang ako lang ikatambag kanimo nga ayaw lang pag-una sa imong hunahuna aron dili maguba ang inyong pagpuyo aron dili perming maguba ang imong adlaw ug tingali pa hinuon og magsakit ang imong kasingkasing.

Duna gyod kini’y rason apan walay nasayod kun unsa kini kun dili siya ra gyod. Tingali kun nahadlok lamang siya nga masayran sa iyang ginikanan ang iyang kahimtang kay basin kun wala pa niya kini isulti ngadto kanila. Basin kun maoy gusto sa iyang pamilya makatabang pa siya sa ilang kalisod. Ug nahadlok siya nga masuko ang iyang mga ginikanan kun ilang masayran nga may pamilya na siya. -- Tita Salie