Langgam sa Kagabhion

Gula 18

“Pila may presyo?” miingon kadtong lalaki nga maskulado.“P2,500 lang,” ni Eva.

“Ah! Mahala gud,” miingon ang lalaki.“Natural,” ni Eva pa. “Bag-o pa gud ni siya. Pero gawas sa iyang bana, ikaw ang makauna.”

Wala ko magtingog. Namati lang ko sa gipanagsultihan nila ni Eva ug sa lalaki.

Gipangilogan kong naminaw sa gipanagsultihan nilang Eva ug sa lalaki. Mora ako’g tinda nga gibaligya ni Eva ngadto niini. Gikulbaan ko. Namatikdan ko nga kursonada ang lalaki kanako. Nasihag ko kini sa kinidlap sa iyang mga mata kanang motan-aw siya kanako.

“Wala na gyud nay hangyo?” matud sa lalaki.

“Wala na gyud,” matud ni Eva. “Way hangyoay. Di lagi ka magmahay.

Nagkasinabot sila. Sa dakong paniid, mora’g kuwartahan ang lalaki kay mikubit man sa presyo nga gihatag ni Eva niini para kanako.

Nanakay mi sa usa ka luhong kotse nga gi-parking sa usa ka eskina. Ang lalaki nga maoy mamahimo kong kustomer maoy nagmaneho. Gipalingkod ko ni Eva sa tupad niini. Si Eva ug ang lalaki maoy nagtupad didto sa luyo.

Didto kami mosangko sa usa ka motel nga dili ra kaayo layo sa downtown. Pagkanaog namo, miduol dayon kami sa counter aron magpa-check in. Si Eva gidala sa lalaking iyang kuyog ngadto sa sulod sa usa ka kuwarto. Ako usab gidala sa lalaki nga akong kuyog ngadto sa laing kuwarto. -- Sumpayan pa