Daplin sa Baybayon

Gisuot kong masiot nga lasang sa katologon

Ayawat sa daklit maangkong himaya sa kagahapon,

Apan, ay...way bisan tunob sa landong nagpabilin

Uban sa huni gibanlas sa lapyahan sa kawalaan!

Kuyamoy sa kahimatngon sa akong paghinanok mihiram,

Unya mipakli sa tulokibong mga panid sa paghandum

Niadtong tuling mga lakang sa nagdilaab kong paglaum;

Nagbanwag sa dalan padulong sa limbo sa kahimayaan!

Apan sa kalit mihuros ang unos sa kawad-ong tuman,

Sa lapyahan sa pagluib kapikas ko gipadpad sa hilum;

Sanglit uhaw’g gutom siya way igong kusog ikabatok

Sa huros sa limbong ngadto sa lilo sa kalimot...!

O, kabatan-ong hupong sa mga yugtong labing malipayon,

Kang kansang sugilanon nagpabiling lab-as ug tulokibon

Nga gipatik ning mga panid sa masakit nga pagpalandong;

Sa pagpangga kong gisuklian sa mapait mong mga limbong.

Ning mga taknang malaay sa nagkaawop kong kahaponon,

Igo na lang ako sa pagtagay sa mapait nga paghandum;

Pag-aninaw sa gugmahanong mga yugtong labing mabolokon.

Sa nagkagidlay’ng payag sa himaya daplin sa baybayon..! Tel. no. 415-5446