Nagrosaryo na lang San Roque, Talisay City

Alas otso sa gabii, nahurot na og pamauli ang mga bisita nga misaksi ug mipahalipay sa kasal ni Ramon ug Lily. Gadabudabuhan ang dughan ni Ramon sa kakulba. Dili madugay magakos na gyud niya ang lawas ni Lily ug matagamtam ang gitagoang katam-is niini nga dugay na niyang gipangandoy.

Miuna pagsulod sa kuwarto si Lily. Gihubo dayon ang iyang gisul-ob nga sinina sa kasal. Ang kamison na lay nahabilin. Tungod sa kanipis ug kasihag niini, misamot ang lawas ni Lily ka matintalon nga tan-awon. Miamag ang kahamis sa iyang dughan nga wala pa gyud matandog ni Ramon sulod sa tulo na ka tuig nilang panaghigugmaay.

Nagdali nga misunod pagsulod sa kuwarto si Ramon. Walay haganhagan nga migakos ni Lily nga mahinamong nagpaabot. Nag-akob ang ilang mga ngabil nga puno sa kahinam. Hapit mangatumba sa ilang pagdinali og higda sa kama. Wala’y hunong ang paghapuhap ni Ramon ni Lily. Milit-ad ug nakapiyong si Lily sa kalami nga iyang gibati. Apan dihang kuhaon na unta ni Ramon ang hapin, kalit nga gipugngan ni Lily ang kamot ni Ramon dungan ang hangyo sa usa ka tingog nga maguwang lang og diyotay sa hagawhaw:

“A...a..ayaw... Mon, kay ‘fertile period’ nako ron. Pugngi una ang imong kahidlaw karong semanaha. Dili lang ikaw ang nangandoy sa katumanan sa atong gikahidlawan. Labaw pa kong naghinamhinam nga motidlom na unta ang imong kainit sa akong kinailadman. Sukad sa atong panaghigugmaay, atong napugngan ang maong kahidlaw tungod sa pagtuo nga ang pagka-usa sa atong lawas usa ka balaanong buhat sa gugma nga nagkinahanglan og panalangin una buhata. Mahimo mo na ang tanan nga anaa sa imong hunahuna kay nakasal na man ta, apan hinumdomi una ang atong gikasabutan nga palapason nato ang duha ka tuig una ko magmabdos aron ta makabayad sa atong gigasto sa kasal. Ayaw padala sa bul-og sa imong kahidlaw. Puy-i ang mga pagtulon-an nga atong nakat-onan gikan sa ‘pre-cana seminar’.”

Nahinumdom si Ramon nga sa wala pa sila   kasla ni Lily, mitambong sila og ‘pre-cana seminar’ aron makakuha og sertipikasyon sa simbahan, pagmatuod nga sila andam na nga mosagubang sa mga tulubagon sa kinabuhing minyo. Sa maong seminar, gibalikbalik ang pahinumdom kun unsa kabililhon ang kasabutan nga ilang panumpaan atubangan sa Pari, nga saksihan sa katawhan diha sa sulod sa simbahan. Gitudlo usab ang NFP (natural family planning). Gibalikbalik usab pagpasabot nga usa sa mga paagi sa NFP mao ang puasa; nga dili maghilawas panahon sa ‘fertile period’ sa babaye aron kalikayan ang pagmabdos.

Karon, nasabtan na ni Ramon ang katin-aw ug tumong sa pagpugong ni Lily sa iyang kahidlaw. Para niya, ang usa ka semana nga puasa mubo ra nga panahon kun kini itandi sa tulo ka tuig niyang agwanta nga dili magun-ob ang ilang pagsinabtanay. Dili makatarunganon nga ang iya rang gusto maoy tumanon.

Sa dakong pagtahud ug pagmahal, gihunghungan ni Ramon si Lily nga magrosaryo na lang sila aron makatulog og sayo. (Katapusan)