Guwapa nga Tindera

Gula 2

Pagkahapon. Gikan nga naligo si Max kay mosimba siya sa Basilica del Santo Niño dihang mitingog ang message alert sa iyang selpon. Gipasagdan lang ni Max ug nagpadayon siya sa pag-ilis. Apan nadungog ni Max nga adunay mitawag kaniya sa selpon kay mitugtog man ang kinaham niya nga ring tone- ang awit ni Whitney Houston nga Saving All My Love for You.

Bisan wala pa mahuman pagsul-ob sa iyang pantalon si Max, midali-dali si Max og lukso-lukso paingon sa gibutangan niya sa selpon ibabaw sa lamesa. Apan na-disconnected na ang tawag.

“Uy, gikan ni Katrina ang maong tawag!” Hilom nga gibati'g kalipay si Max, ilabi na nga may nakita siya nga duha ka message gikan ni Katrina. Iya kining gibuksan.

Nangayo’g pasaylo si Katrina kay wala dayon niya matubag ang text message ni Max sanglit dili siya mogamit og selpon kun maninda og isda kay mamilit sa iyang kamot ang lansa.

Nagpahibalo kini kang Max nga nagpapuli na siya og paninda'g isda sa iyang Mama kay mosimba man gayud siya matag Sabado sa hapon. "Mosimba ka diay Kath? Magkuyog ta'g panimba sa Santo Niño?" iyang gidapit si Katrina nga mag-uban sila.

"Sige, kuyog ta kay mag-uban man 'sab mi og ang akong ig-agaw kay mamalit mi og sinena para isul-ob nako sa birthday nga akong tambongan ugma," matud ni Katrina.

Tuod nagkita sila sa grotto kilid sa altar sa Basilica del Santo Niño. Daw nanglurat ang mga mata ni Max dihang nakakita ni Katrina nga misamot kaanyag nga nagsul-ob og bestida.

Wala makapugong si Max sa pagsige'g tutok sa dalaga. Taud-taud, ang ig-agaw ni Katrina dunay gihung-hong. "Max, biyaan ko usa mo og ang akong ig-agaw ha kay para makalugar mo," matud ni Shirley.

Apan ang tinuod mao nga mibuwag si Shirley kang Katrina tungod kay makigkuyog kaniya ang iyang boyfriend. "Ayo-ayo mo gaw ha? Max take care sa akong cousin ha?" ni Shirley pa sa dayong biya nga nagpahiyom.

"Kagwapa g'yud diay nimo Kath uy basta magbistida ka. Manuroy usa ta kay nakahuman na man kaha mo pagsimba," giingnan ni Max si Katrina. Hinay-hinay sila nga milakaw paingon sa Plaza Sugbo atubangan sa City Hall. Nagkalingaw sila pagsuginlanay sa ilang mga kaagi.

Misandig sila niadtong pula nga kotse apan wala tug-ani ni Max si Katrina nga iya kadtong sakyanan. (Sumpayan)