Gwapa nga tindera

Usa ka adlaw’ng Sabado nakahuna-huna si Max nga mohigup og init nga sabaw sa tinuwa aron paghingilin sa kasum-ol sa karne sa iyang ginhawaan.

Daghan man gud kaayo og imbitasyon nga nadawat si Max kay nagsunod-sunod ang birthday sa iyang mga higala ug dili gayud magpabalibad.

Miadto si Max sa usa ka gamay’ng tyanggihan nga dili nato ibutyag ang dapit aron dili mailhan ang mga nalambigit niining tinuod nga sugilanon.

Giliraw ni Max ang iyang mga mata sa mga isda nga gihikyad ibabaw sa mga lantay sa tindera. Gusto ni Max nga dagku nga isda ang paliton kay mamitoon ang sabaw sa katambok.

“Sir isda, lami kaayo ni sa tinuwa. Gwapa kaayo ning akong isda, mamsa ni sir,” matud sa tindera ngadto kang Max. Miyangad si Max sa tindera ug kalit lang nga daw giragbi ang iyang panan-aw nga mipilit sa dagway sa tindera.

Nagpasumangil si Max sa pagpangutana apan gituyo niya kini kay wala kapugngi sa maibogon niya nga kasing-kasing nga nabihag na usab sa kaanyag sa maong babaye.

“Pila ang kilo niining maong isda gwaps,” gipangutana ni Max ang babaye. “Two hundred pero ikaw man P180 lang sir,” tubag sa babaye. “Sige mokuha ko og duha ka kilo basta hatagan ko nimo sa imong contact numbers ug amiga na ta,” nagngisi si Max nga mihatag og kondisyon sa tindera.

Wala makapugong sa pagpahiyom ang tindera nga gwapa ngadto ni Max. “Sure, kana ra diay sir, hatagan tika sa akong contact numbers. Duha ka kilo ang imo?” sa tindera pa nga mihiwa dayon sa isda nga mamsa.

Mihatag g’yud tuod ang babaye sa iyang contact numbers. Nagpaila kini sa iyang ngalan kang Max. “Matag Sabado ug Domingo ra man ko makapaninda sir kay nag-eskwela man ko,” pasabot sa babaye. “Bantug ra nga mora’g dili ka gayud tinuod nga tindera og isda kay gwapa ra kaayo ka. Text unya ko nimo ha, Max ang akong ngalan,” giingnan ni Max si Katrina.

Pag-abut ni Max sa ilang balay, giluto dayon sa iyang inahan ang pinalit niya nga mamsa. Nagpalit na man ‘sab daan si Max ug mga lamas.

Gikuha dayon ni Max ang iyang selpon ug gikalingawan og pindot-pindot. Suwayan niya og mo-reply ba kaniya si Katrina. “I’m very lucky this morning ‘coz I met a pretty girl named Katrina.” Gi-send dayon ni Max ngadto sa contact numbers nga gihatag ni Katrina kaniya.

Apan wala gayud siya makadawat og reply. (Sumpayan)