Katam-is handumon

 Gula 5

Giganahan kaayo si Siegfred sa tinagdan ni Sally kaniya. Mauwaw unta siya nga makigsuod sa dalaga kay nasayud siya nga layo ra kaayo sila’g kahimtang kay kwartahan sila si Sally, samtang siya kawani lang sa usa ka inila nga auto repair shop.

Gitumanan niya si Sally nga manglingkud sila sa hamis kaayo nga bato daplin sa baybayon. “Maayo gani Fred kay gidala tika dinhi sa probinsya. Kun wala pa, mingaw unta kaayo ko nga magpaabut nilang Daddy ug Mommy,” matud ni Sally.

“Pirmi ka ba diay nga moanhi niining dapita ug molingkud aning dakung bato kun moanhi ka sa probinsya Sal?” ni Siegfred pa nga mausisahon kaayo. Wala dayon motubag si Sally nga milingiw ug milantaw sa dagat. Nasabtan ni Fred nga dunay gihuna-huna si Sally. “Ang akong boyfriend kaniadto nakapanuroy sab mi dinhi. Sama aron, hayag usab ang buwan. Nagsinaaray kami, apan nangita siya’g lain,” matud ni Sally nga daw mikurog ang tingog. Nakabantay si Siegfred nga naghilak si Sally.

“Sally, sori kaayo ha nga nakapangutana ko nimo niadto, naguol ka na hinoon. Sige dili na kita mag-estorya bahin niana,” ni Siegfred pa nga miagbay ni Sally. Giam-aman niya ang dalaga. “Ayaw na’g huna-hunaa ang imong boyfriend, makakita ka pa og buotan nga magmahal kanimo, gwapa ka gud,” dugang ni Siegfred.

“Maayo ka Fred kay malipayon ka g’yud tingali uban sa imong girlfriend,” matud ni Sally. Milingo-lingo si Fred ug gisaysay usab kang Sally ang iyang kaagi sa gugma. Managsama sila’g kasugiran nga binudhian sa ilang minahal. Wala usab tuyoa nga milugmaw gayud ang mga luha sa mga mata ni Siegfred nga nagsugilon sa iyang kaagi sa gugma ngadto ni Sally. Mitutok kaniya si Sally kay nabantang man ang dagway sa ulitawo pinaagi sa dan-ag sa buwan.

“Fred, nalooy ko sa imong gidangatan. Managsama kita nga biktima sa gugma,” midip-ig si Sally kang Siegfred. Wala tuyoa ni Fred nga nagakus niya si Sally ug daw kalit kaayo ang pagkilab sa panahon ug diha na sila makabantay nga nag-abot na ang ilang masig ka mga ngabil.

“Kanindot kun ikaw pa ang akong boyfriend Fred,” wala makapugong si Sally sa paglitok niini ngadto ni Fred. “Sally, bisan sa kabag-o pa nato nga nagkaila, apan nabatyagan nako nga may pagbati dayon nga migitib sa akong kasing-kasing para kanimo,” ni Fred pa nga migakus pag-ayo kang Sally. Nag-ukobay na usab ang masig nila ka mga ngabil nga puno sa pagmahal.

Gipahiran ni Sally sa iyang palad ang mga luha sa mata ni Fred, ug ingon usab niini ang gihimo ni Fred ngadto sa dalaga. (Sumpayan)