Unsa ang kinabuhi sa pangadye?

Gisaway kita, mga Romano Katoliko, sa ubang mga relihiyon. Nganong mag-ampo kuno kita atubangan sa mga imahen? Ngano kuno nga magbalikbalik atong pangadye sama sa Amahan Namo, Maghimaya Ka Maria, Mituo Ako. Ug uban pa. Nganong dili kuno kita modirekta sa pag-ampo ngadto sa atong Ginoo?

Sagad gud sa ubang relihiyon, kun sila mag-ampo, direkta gyud sa Ginoo. Spontaneous. Wala’y basahon nga giaray. Kun unsay ilang pangayoon, kun unsay ilang ipasalamat, tanan deretso ngadto sa Ginoo. Gani, dili man sila manguros. Basta, kun unsay gihunghong sa ilang kasingkasing, kini ilang isugilon sa Ginoo.

Nindot baya ang atong Romano katoliko nga relihiyon. Aduna kitay mga rebulto nga gipabarog sa altar, diin ang tumong niini mao: aron ang atong imahinasyon nga makita nato Siya sa personal mosamot katin-aw ug kalig-on, diin kun mo-concentrate lang gyud ta sa pag-ampo, ma-feel nato nga anaa siya sa atong atubangan, nakig-uban nato, naminaw nato ug mihapuhap sa dughan tang samaran.

Usa ka sayop nga praktis nato mao: Kun magtamod gani tag basahon sa pag-ampo, daw nagbasa ra gyud ta tinuoray. Word for word atong gilitok apan wala ta makasabot unsay atong gibasa? Or, nakasabot man tuod ta, pero kutob ra diha -- ang atong kahiladman nagpabiling haw-ang. Ngano man? Tungod kay sa mata ug sa dila ra man kutob nato gipa-estar ang maong mga pulong. Wala man nato padayona lahos ngadto sa atong kasingkasing. Wa gani nato pa-estarag dugay sa mga mata ug baba. Gisulod man tuod nato sa mga mata, apan gipagawas lang usab dayon sa baba.

Kana lang panahon sa ‘Amahan Namo’ sa misa, pastilan, ingon sa maglumba gyud paglitok ang mga manimbahay. Haskang paspasa! Labi na’g ang pari motan-aw sa iyang relo de pulso (hinuon di tanan, ha?) mora lagi’g karera sa kabayo! Maayo pag kantahon na lang kay may kinabuhi. Labi na, kanang pagpangadye sa 9 ka adlaw nga nobena sa patay. Haskang kusoga mokitibkitib sa baba sa mananabtan. Way comma, way period. Daw nagdulag siyatong -- taas kaayo’g utong.

Mao ni mga rason nganong gisaway ta sa ubang laing mga tinuhoan. Ug dilinato sila mabasol. Kay tinuod man sab ang ilang na-obserbahan. Hinungdan, nga na-misinterpret ta nila. Apan kun aduna lay kinabuhi kanunay ang pag-ampo ta, kun ang matag pulong nga atong gibasa, dili lang nato dalidalion; hinunoa, ipinahimutang sa paglitok inubanan sa kinasingkasing nga pagsabot, pagkaanindot sa pagpakig-uban ug pagpakig-estorya nato sa Labaw’ng Makagagahom.

Kinahanglang tin-aw gyud ang pagkasulti ang unsay atong gustong pangayoon ug ipasalamat sa Ginoo. Ug kinahanglan nga kita seryoso ug nagmatinud-anon, diin mahimo lang kini kun ang tanang balaanong pulong nga migawas sa baba ta nagagikan sa atong kasingkasing. In short, let’s feel His presence through our deep imagination. That God is here, standing always at our side to hear and guide us. Busa ang magtabi ug magtener og selpon sa simbahan. Kay instrumento kini sa yawa nga makaguba sa atong deep imagination.

Kun nabati nimo nga sa imong pag-ampo, anaa ang Ginoo, bulahan ka kay naangkon nimo ang tinuoray nga kinabuhi sa pagpangadye.