Ang iring ni Kringkring Lalawigan sa Sugbu

Pinangga kaayo ni Kringkring ang iyang iring. Gianggaan niya ni og Mengmeng. Lunlon orange ang kolor ni Mengmeng, bugtong anak sa ilang inahang iring nga banbanon nga kumagat kaayo sa mga siaw nga ilaga.

Matag buntag, maoy pangitaon dayon ni Kringkring ang pinangga niyang iring. Iyang kugoskugoson si Mengmeng. Hapuhapon, usahay, idulog pa gani niya sa iyang kuwarto sa paghigda si Mengmeng. Magpangita ug mingawon si Kringkring sa pinangga niyang iring kun dili kini niya makita. Sa edad niya nga sayes, nahimong suod na kaayo sa iyang dughan ang pinanggang iring.

Ug sama ning buntaga karon, maoy natukmaan nilang Rey ug Dina nga naghilak ang bugtong nilang anak.

“Nang Bikay, nganong naghilak si Kringkring?” pangutana ni Rey sa ilang katabang ning buntaga.

“Bitaw, nang Bikay, nagbakho man si Kringkring!” dason ni Dina nga miduol dayon sa naghilak nga anak diha sa ilang sopa.

“Unsaon man sir Rey, mam Dina, wa man makit-i ni day Kringkring ang iyang pinanggang iring! Nawala man gud si Mengmeng!” pangatarungan sa katabang babaye.

“Pa, Ma...!” ni Kringkring nga padayong nagbakho paghiak. “Wa ko kit-i, mengmeng! Wala man akong pangga iring...!” misamot ka paraygon si Kringkring ngadto sa iyang papa ug mama. Naghingoshingos siya.

Gialam-alaman ni Dina ang bugtong anak.

“Nia ra lagi to dinhi sa atong balay si Mengmeng, day! Pangitaon lang nato!” maymay ni Dina sa paraygong anak.

Gihapuhap usab ni Rey ang bukobuko sa pinanggang anak.

“Sagdi lang, day Kring! Tabangan ka namong mama mo sa pagpangita sa nawala mong iring!”

Nalipay si Kringkring nga nakapahiyom nga mitutok sa iyang papa ug mama.

“Sige, pa, ma, ha? Ngita ta, Mengmeng! ngita ta!”

Gipangita dayon nila ni Rey, Dina ug Kringkring ang nawalang gamay’ng iring. Wala sa kuwarto ni Kringkring. Wala sa kusina. Wala sab sa natad. Wala sa ilawom sa silong. Gisusi nila ang mga tanom sa harden. Giukay nila ang ilawom sa tanang mga mesitas. Unya, sa ilawom sa labong punoan sa bombil, may nakita si Kringkring. Nakasinggit siya sa tumang kalipay.

“Pa, ma, dia ra Mengmeng!”

Nagdaling miduol sila si Rey ug Dina sa nahimutangan ni Kringkring.Ug nakita nila si Mengmeng nga nagtutoy diay sa inahan niining iring, ilawom sa labong nga bombil. Misinggit sa kalipay si Kringkring nga nakit-an na gayud niya ang pinangga niyang iring ning buntaga. (Kataposan)