Birthday

Dear Tita Salie,

Hello, Tita and how are you. I am an avid reader of your column. Ganahan kaayo ko mobasa sa imong mga advice kay daghan ko og makat-onan.

Ang akong problema mahitungod kini sa akong boyfriend nga usa ka polis. Nanguyab siya nako, Tita, dili pa lang gyud dugay. Tungod lagi kay caring kaayo siya ako siyang gisugot. Ug niadtong July 7, nag-celebrate ko sa akong birthday. Ug sa dili pa ang akong birthday iya kong giingnan nga isuroy ko didto sa Simala ug iya daw ko nga i-treat. Busa nisugot usab ako kay caring siya.

Tuod man nanuroy mi didto sa Simala. Ug human namo sa Simala nangaon mi didto sa Jolibee. Samtang nangaon mi nag-estorya mi mahitungod sa sunod namong adtoon. Ingon niya nga mag-video-k kuno mi ug misugot lang usab ako. Apan dili video-k-han ang iyang gidalhan kanako kun dili usa ka motel. Wala ko mosugot, Tita. Apan kusgan kaayo siya ug sirado kaayo ang lawak. Wala koy nahimo, Tita ug milampos gyud siya pagkutlo sa akong pagka-birhen. Matud niya nga unya na lang daw mi magminyo kay maghimo una siya og balay.

Puwede ba ko nga mosumbong sa iyang gibuhat, Tita, nga dili man gyud unta ko mosugot sa iyang gibuhat? Palihog pasabta ko. Thank you very much more power.

* * *

Maayong adlaw,

Manghinaut ko nga ang imong suliran makahimo ug maghatag unta og leksiyon sa uban natong mga kababayen-an nga dili gyud mokumpiyansa og dili magpataka’g kuyog sa mga lalaki, labi na sa mga lalaki nga dili pa kaayo nato kaila. Tungod kay wala kita masayod sa dagan ug lihok sa ilang panghunahuna. Nga tungod kay yano kaayo kang mikuyog kaniya didto sa Simala, nagtuo na siya nga madala kana bisan asa niya gusto nga dad-on ka.

Ang punto usab diha nga kun dili unta nimo gusto ang inyong giadtoan wala ka unta nisulod sa pultahan sa maong lawak. Pagkahibalo nimo nga motel na ang inyong gisudlan wala ka unta nagpadayon tungod kay nasayod kana kun unsa’y iyang tuyo ug tumong diha kanimo.

Pero imong pamatud-an nga wala kay pagtugot sa maong hitabo. Moadto ka sa ilang campo aron moreklamo. Inig adto nimo sa campo pangutana sa information kun asa kang dapita pwede moreklamo sa ilang polis nga nakasala kanimo. Aron ila kang magiyahan mahitungod sa mga angay nimong buhaton. -- Tita Salie