Salamat sa Baha

Gula 6

Nananghid sila si Dennis ug Lovely nga mopauli na. Apan sanglit gabii na kaayo, wala nay taksi nga ilang masakyan, ilabi na nga may pagkahilit ang dapit nga gipuy-an sa ig-agaw ni Lovely.

“Maghabal-habal na lang g'yud mo gaw,” matud ni Angie ngadto sa iyang ig-agaw. Tuod, duna dayo'y motorsiklo nga misapigad sa nahimutangan nila ni Lovely ug Dennis.

Napugos sila sa pagsakay. Magpahatod na lang kita sa Guadalupe uy kay gabii na, matud ni Lovely. Wala mosupak si Dennis ug siya ang milingkod sa likod sa drayber ug sa iyang luyo si Lovely.

Dili kaayo kusog ang pagpadagan sa drayber sa habal-habal, apan mikalit lang pag-ikid-ikid ang dagan sa motorsiklo dihang nakatamak kini og lawom nga libaong.

Mipahunong ang drayber nga nagpanglingo-lingo. “Dimalas, na-flat ang ligid sa atras. Wala ra bay vulcanizing dinhi da.”

Gikulbaan sa hilom si Lovely kay medyo mingaw ang ilang nahimutangan. “Mobalik na lang ko bay, i-ran flat na lang nako ning motor,” matud sa drayber.

Milakaw sila si Dennis ug Lovely. Gipaningot sila sa paglinakaw apan kalit lang mibunok ang uwan.

Nagdinaganay sila sa pagpangita'g kapasilongan. Sa unahan may nakita sila nga kapasilongan. Pareho nga naghangos sila si Dennis ug Lovely. “Nangita na gyud to sila si Mama nako ron Dens,” matud ni Lovely.

“Unya, wala man ta’y mahimo kay kusog kaayo ang uwan,” dali nga tubag ni Dennis. Mikusog pa gayud ang uwan ug misalibo sa ilang nahimutangan. Napugos sila sa pagpidpid pag-ayo sa daplin aron dili sila mabasa.

Nagdikit na ang ilang masi’g ka lawas. Inanay nga natintal si Dennis ug mapinanggaon niya nga gigakos si Lovely. “Gakson tika Lov kay aron dili ka mabasa,” giingnan ni Dennis ang dalaga.

Wala magtingog si Lovely nga gigakos ni Dennis. Nanginit ang kalawasan ni Dennis samtang naggakos ni Lovely. Migukud ang iyang ginhawa. “Lovely, I love you,” wala na makapugong si Dennis nga migakos na paghugot ni Lovely.

“Dennis, Dennis,” mao ray nalitok nga pulong ni Lovely dihang hinay nga mituyok ug miatubang kang Dennis. Nagparayganay ang duha taliwala sa kusug nga pagbunok sa uwan. (Sumpayan)