Gula 47
Paghibalik niya sa Antuwanga maoy unang misantop sa iyang hunahuna ang pagpakigkita sa iyang tiyo Tibur. Naghinamhinam siyang makita ang uyoan. Gidala niya ang tropeyo nga gihatag sa CCP kaniya. Gusto niyang ipaambit sa iyang uyoan ang iyang kadaogan. Gusto niyang makita niini ang matahom nga tropeyo nga iyang nadawat gumikan sa iyang pagdaog sa tigi sa sinulatay.
Namatikdan ni Melchor ang lahi nga tayhop sa hangin samtang naglakaw siya sa duas nga baybayon. Nagmingaw ang payag ni Tiyo Tibur niya. Lahi karong adlawa sa nangaging mga panahon nga magdangadanga pa gani siya sa payag mabati na niya ang hinagtok sa makinilya.
“Maayong adlaw,” nangatahoran siya paghimuntog sa lagkaw.
“Dayon,” tingog sa iyang uyoan nga naggikan sa sulod sa payag.
Midiretso siya’g saka. Natukmaan niya ang iyang uyoan nga nagpahimutang sa kaugalingon sa usa ka duyanan.
“Uy, ikaw man diay, Metlong,” sa lagas pa nga nahinangop pagkakita kaniya. “Kanus-a ka lang nahiabot?” -- Sumpayan pa