Nakita ko ang Diyos

Sogod, Cebu

Barkadista ko. Spoiled kong pagka anak. Bugtong laging anak. Pinangga kaayo ko sa akong mga ginikanan. Nganong ihikaw man usab nila ang akong pangayoon? Dagko sila’g suweldo.

Si Mama Elena Accountant sa dakong kompaniya sa siyudad. Ug si Papa Paolo Manager sa usa ka Advertising Agency.

Sa inilang university ko nagtungha sa kolehiyo. Pulos anak ug dato ang akong mga barkada. Si Emelyn, anak og negosyanteng mga ginikanan. Si Carla, anak og piloto sa ayroplano ug doktora. Kaming tulo magyampungad sa diskohan kun wala’y klase. Kanunay mag-beach. Ug uban pang lingawlingaw.

Usa ka kaadlawon nga mipauli ko, gikasab-an ko ni mama ug papa. Naghuwat diay sila sa akong pagpauli.

“Naunsa ka na man intawon, Jennelyn? Gipatawag mi kagahapon si mama mo sa inyong Dean. Wala ka naman diay mosulod sa klase!”

Namula ang nawong ni papa sa kasuko. Ug si mama sab hapit nalang ko niya tulisoka.

“Naglaum mi si papa mo nga nagtinarong ka sa pag-eskuyla, Jennelyn! Pulos man lang diay barkada ang imong giatubang!”

“Sus, di bitaw modagan ang eskuylahan. Kaguol man ninyo!” Nangisog sab ko. Wala ko mahadlok sa akong mga ginikanan.

Naghilak si mama sa kasuko. Ug si papa nagpanglingo nalang. Wa ko mananghid nila sa akong pagsulod sa akong kuwarto. Nakatulog dayon ko. Gikan kami si Carla ug Emelyn sa night club. Nakainom ko. Kaming tulo gayod si Emelyn ug Carla ang nakaundang sa pag-eskuyla. Dako na kaayo kami’g panahon sa paglulinghayaw. Kanunay kami nag-joy riding sa awto ni Emelyn. Kasagaran kaadlawon na kami mamauli. Mora’g wa na namo tagda ang among mga ginikanan. Hangtod nga nadisgrasya ang among gisakyan. Namatay si Emelyn ug Carla. Dugay kuno kong way kalibotan sa ospital.

Human ko makagawas sa ospital, wala na ko molaag. Kanunay na kong nagpuyo sa balay. Usa ka higayon nga naglingkod ko sa among terrace, giduol ko sa akong mga ginikanan.

“Kanunay ka naman lang nia sa balay, Jennelyn. Suroy sab og panagsa.” Nakatan-aw ko kang mama. Nagpahiyom siya nako. Ug si papa sab mapahiyumon kaayo nako. Wala na masuko ang akong mga ginikanan nako.

“Magbinuotan na ko, Ma, Pa. Nakita ko ang Diyos samtang didto ko sa ospital sa panahon nga inyong giingon nga dugaydugay kong walay kalibotan.”

Gigakos ko ni mama. Misunod sab paggakos si papa nako. “Gihatagan ka’g ikaduhang kinabuhi sa Diyos, anak.”

Nakahilak si mama sa kalipay. Mao sab si papa. Ug gisubli ko pagsaad kanila nga magtinarong nako sa akong kinabuhi. Ug mulampos gyod ko sa pag-eskuyla.

Mihangad ko. Ug mora’g nakita ko pag-usab ang pamayhon sa Diyos didto sa langit. Nakapahiyom ko. (Kataposan)