Second opinion

 Nigawas si Myrna sa operating room sa Meadow Medical Center. Naglakaw lang siya padulong sa Nurses’ Station diin naghulat karong hapona iyang anak nga si Melchor. Kay simple ra kaayo iyang operasyon. Timoy ra’s ilong ang gibandahian sa doctor. Dunay bugon nga nitubo nga mora na ka dak-a og diyolin. Nahadlok siya’g ma-cancerous. Ug iyang gipaoperahan dayon. Nakaamgo siyang dili gyud tanang doctor mosulti sa tinood. Imbis sila ang gitugahan sa kaalam sa panambal, biktimahon pa gyud ang pasyente nga way alamag mahitungod sa panambal.

“Di lang ko mokuha sa resulta sa biopsy, Ma. Kay basig di ko kapugong sa akong kalagot anang doktora. Makasulti unya ko’g ngil-ad!” ni Melchor sa ilang paghinabi sa gawas sa klinika ni Dr. Olga Paras sa niaging semana.

Kompiyansa lang si Myrna nga tarong ang doctor iyang naduolan. Gipanapi ug giilad siya. Nakabayad siya og tres mil pesos bayranan kuno sa biopsy. Maong mahal kay ipadala pa sa Manila. Kay tua’s Manila ang laboratory alang sa biopsy.

Pagsumbong ni Myrna sa anak, nga dili pa siya maoperahan dayon kay hulaton pa ang resulta sa biopsy, nakapangunsulta’g laing doctor si Melchor. Gawas pa ana, nakahinabi niya si Nida ugangan ni Melchor, inahan sa iyang kapikas nga si Fiona.

“Tuig 1983 gioperahan ko sa cyst sa akong walang totoy. Gi-biopsy sa ospital dinhi sa dakbayan. Pagkaugma naoperahan dayon ko. Dili na tinood nga way laboratory para biopsy dinhi sa Sugbo oy!” ni Nida. Maong naglagot si Melchor nga giilad sa doctor iyang mama.

Magtutudlo sa saring publiko si Myrna sa lungsod sa Mideacadenza. Tagsa ra masuroy sa siyudad. Nagtuo seguro ang doctor nga tagabukid siya. Ignorante. Giilad. Unya nitawag nga niabot na ang resulta sa biopsy, nadangtan pag usa pa ka semana. Kay si Myrna ang nangunay pagkuha sa resulta sa biopsy, gisultihan siyang Dr. Paras, nga irekomendar og surgeon nga moopera sa bugon sa ilong. “Di lang ko paopera sa imong irekomendar dok. Kay madoble ang bayranan. Bayad pa ko’s nagrekomendar. Bayad sab ko’s girekomendar” ni Myrna nga nidali og gawas sa klinika sa doctor.

Si Nida ang nagrekomendar ni Myrna sa maong tambalanan, diin ang directress sa maong ospital nga usa ka madre, ig-agaw ni Nida. Gihatagan sila’g doctor nga tarong.

“Dali ra man ni kaayong operahan. Wa magkinahanglan og biopsy oy,” ni Dr. Isaac Newton.

Biyuda na si Myrna. Si Melchor ikaduha sa tulo niyang mga anak nga puro lalaki. Si Charlie ang kinamaguwangan, usa ka electrical engineer. Naminyo og nurse. Tua namuyo sa Makati. Si Melchor, magtutudlo sab. Naminyo og magtutudlo sab. Ipon sa iyang mama og puyo sa ilang lungsod. Si Hector ang kinamanghuran, bag-o lang nakahuman og Computer Engineering. Nangaplay pag trabaho.

“Kumusta na man, ma?” ni Melchor nga nagbarog duol sa Nurses Station. Niamin sa inahan pag-abot nila.

“Dali ra man kaayo ang operasyon,” ni Myrna.

“Way sakit?” ni Melchor.

“Sakitsakit gamay sa pag-indyiksiyon sa anistisya. Unya mao naman la’g gilokgilok sa pagtangtang sa bugon” ni Myrna. Mapahiyomon na.

Mora kadak-ag peso nga coin ang bandahi sa iyang ilong.

“Unsa ka dali ang operasyon, ma?’ ni Melchor nga niagbay sa inahan nga nikuyog padulong sa gawas sa ospital.

“Kapin kun kulang, kinse minutos ra gyud” ni Myrna.

“Unya, unsa may pulong sa doctor mahitungod sa biopsy?” ni Melchor.

“Wa man kinahanglana ang biopsy” ni Myrna.

“Pila ra may gipangayo sa doctor nga nag-opera?” ni Melchor.

“Tres mil pesos ra” ni Myrna.

“Tiaw mo na. Grabe gyung pagkailad nimo” ni Melchor.

“Abi nakog abogado ray kamaong mangilad. Hasta pod diay ang doctor!” ni Myrna. Nagkinataw-anay nalang sila. Nadugangan ilang kaalam nga dili na bastabasta mosalig og usa lang ka doctor. Kinahanglan gyud nga mangitag second opinion. (Katapusan)