Si Tarzan ikogan

Tan-awa si Tarzan basa kaayo. Nakalarga na ang lantsa nga gisakyan ni Tatay Indong nimo. Niubog na pud ni sa dagat aron pagsunod og langoy sa lantsa,” pulong pa ni Nanay Indang nga nagtingsi sa gipakitang dili kasarangan nga lihok ni Tarzan.

“Bitaw Nay, ambot ba niining Tarzan nga wala man gayud kapoya sige og ubog sa dagat aron paglangoy sunod sa lantsa nga kinatigan nga sakyan ni Tatay matag biyahe padulong sa laing isla. Maayo gani kamao pud ni siya mohunong sa pagsunod kun medyo layo na sa baybayon unya mobalik ra pud siya og langoy padulong sa daplin. Sige Nay ari sa ko. Manugway pa ko sa kabaw,” dali nakong biya para pag-atiman sa akong buluhaton sa umahan sa among yuta sa Poloyagan, sakop sa lungsod sa Pagadian (karon usa na ka dakbayan).

Tuig kadto 1965, daghang katuigan na ang nakalabay apan lunhaw pa gihapon sa akong panumdoman ang iyang sinaw nga balhibong puti, taas og barog, lapad iyang mga dunggan nga daw palabad sa bintelador, hatay ang panglawas ug ang tabas sa iyang baba kun monganga daw makatukob og bunga sa lubi nga wala pa bunti, lanog kaayo ang iyang pinaghutan kun dunay katingad-an sa palibot labi na kun mohabol na ang mabugnawong kagabhion. Gikan sa akong pagkagamay nga bata, wala na gayud ko kakita pa og iro nga susama og barog ug kadili kasarangan nga manlihoklihok sama ni Tarzan. Makigduwa siya, makiglumba og dagan, molamano ug mobarog kun sugoon. Ug makamao manluod, kay daw magluha ang mata kun kasab-an unya mohigda nga maghinuktok.

Usa ka adlaw niana, nakahuna-huna si Tatay Indong sa pagdala ni Tarzan sa laing isla aron pud kini makasuroy kay anad man kaayo ug wala magpakita og timailhan nga mamaak og mga tawo o mamugno og sama kaniyang iro. Tuod man, si Tarzan gihigtan og kadena nga gihigot dapit sa luyo nga bahin duol sa makina sa lantsa. Ang biyahe nilungtad og upat ka oras. Sa dihang kuhaon na unta ni Tatay Indong sa iyang nahimutangan si Tarzan, wala na kini og kadena na lamang ang nahibilin.

“Kaluoy ni Tarzan, nalumos na gyud, to. Kadako gyud sa akong pagmahay. Maayo pay wala nako to dad-a” magul-anon nga pulong ni Tatay Indong sa kaugalingon. Wala na gayud kami makadungog pa bahin ni Tarzan human niadto.

Nilabay ang unom ka buwan gikan niadto, samtang naglakaw si Tatay Indong padulong sa baybayon sa silingang barangay aron pagpalit og isda tuwaonon, nadapit ang iyang pagtagad sa saba kaayo ug lanog-lanog nga paghot sa iro nga gihigot ilawom sa punoan sa kahoy nga mansanitas duol sa baybayon. Wala makapugong si Tatay Indong, giduol niya ang iro.

Iyang nasampit, “Tarzan”. Sa iyang kahikurat, ang iro mipakitiwkitiw dayon sa iyang ikog ug hapit siya makabay-i niini sa paghangop kaniya. Sa dihang iyang gihikap ang ulo sa iro, gibaw-an og tilap-tilap sa iro ang iyang kamot. Wala makapugong si Tatay Indong sa gibating kalipay. Gitutokan niya ang iro. Bisan bulingit kini tan-awon tungod sa pagka-way ligo apan tataw gayud nga puti ang buhok niini. Gikumbirahan sa dagkong kuto ang lungag sa dunggan ug gisugdan na og kitkit ang mga kiting sa kagid timaan sa pagkaway atiman.

“Pare Indong, basin og paakon ka sa iro. Ayaw na og hikap-hikapa,” tingog sa lalaki dili layo sa nahimutangan ni Tatay Indong nga nikuha sa iyang pagtagad.

“O, Pare Biyato, ikaw man diay ni. Kining iroa nga gihigot dinhi sa ilawom sa kahoy’ng mansanitas, mao kini ang akong iro nga nawagtang. Tan-awa dili nihangop siya nakakita nako labi na kun akong sampiton og Tarzan,” malipayong pulong ni Tatay Indong.

“Sus, kanimo pre, dad-a na nang iroa oi. Akoy gisabaan ana dinhi magabii. Ako nang nabangalan sa lawod unom na ka buwan ang nilabay. Akong ginganlan na og Bangal. Sige pre Biyato. Salamat kaayo. Karon dayon akong dad-on si Tarzan.” (Kataposan)