Ang palakero

Gula 3

“Gisultihan ka ba ni Jinky kun unsay akong tuyo nimo Lens?” gipangutana ni Dennis si Leny.

“Nangita lagi kuno ka og imong ikadeyt nga kanang tig-apilan sa mga beauty contest kay dili na mauwaw. Misugot na lang ‘sab ko kay duna ko’y paliton nga selpon,” ni Leny pa.

Igo lang miyango-yango si Dennis, dayon gipasaligan niya si Leny nga hatagan niya kini’g kwarta nga para makapalit siya’g selpon nga iyang gipangandoy. Apan nakahinumdom si Dennis nga aduna siya’y bag-ong touch screen nga selpon nga anaa sa iyang compartment sa awto.

Wala niya kini gamita tungod kay dili siya bansay mogamit. Branded ang maong selpon kay gihatag kini sa Globe kaniya dihang mitambong siya og launching sa ilang bag-ong produkto. Gibuksan ni Dennis ang compartment sa atubangan sa gilingkoran ni Leny.

“Unsa na?” nangutana si Leny kay daw nagkalisud si Dennis kay gikuha niya ang gamay’ng karton samtang padayong nagdagan ang kotse. “Bag-ong selpon kana, touchscreen, tan-awa kuno kun ganahan ka ba,” giingnan ni Dennis si Leny.

“Wow, mao ni ang akong gusto nga selpon!! Touchscreen! Imo ning ihatag nako?” daw nagsalimoang si Leny nga wala na gani mahimutang sa paglingkud. Nawala na kadtong iyang kamahinhin kaganina.

“Kun gusto ka ana nga selpon, ihatag nako na nimo…. Apan dunay bugti ha?” matud ni Dennis. “Unsa man, unsa lagi?” nagpakisusi na si Leny sa pagpangutana apan wala buhii ang touchsreen nga selpon.

“Lipaya g’yud ko karon sa atong panag-uban,” giingnan ni Dennis si Leny. “Sure,” mubo nga tubag ni Leny kang Dennis.

Wala makabantay si Leny nga misulod na ang kotse ni Dennis sa ganghaan nga dunay daghang kwarto sa sulod. “Asa na ta ron?” matud ni Leny nga nahibulong kay human makasulod ang kotse sa grahe sa kwarto, daw otomatik kini nga gisirad-an sa boy.

“Tana, adto lang ta sa sulod sa kwarto mo-order og pagkaon,” giingnan ni Dennis si Leny. Nakabantay si Dennis nga nasayud na si Leny kun unsa ang dapit nga ilang gisudlan. Wala na gani kini magtingog pa.

Didto sulod sa kwarto, gitan-aw pag-ayo ni Leny ang selpon. “Pwede akong itaud ang bateri?” giingnan niya si Dennis. Human mataud ang bateri, gi-on dayon ni Leny ang selpon. Nalingaw kaayo si Leny.

“Ibutang usa kanang selpon Lens, gusto usa ko nga malingaw ‘sab nimo,” matud ni Dennis nga daw kaganina ra nga nagtubod ang laway sa pagtinutok kang Leny. “Salamat kaayo sa selpon ha?” napagakus si Leny kang Dennis. (Sumpayan)