Obligasyon

Bay Chard. Dia ra ba ang imong attachè case nga nabiyaan sa taksi. Swerte kaayo ka nga kaila nako ang drayber sa taksi imong gisakyan gabii” ni Jack ngadto sa iyang higala nga si Richard. Nag-abot sila dinhi sa eskina sa mga dalan Juana Osmeña Ext. ug Gochan Hills ning sayong kabuntagon.

Nagbitbit si Jack sa attachè case kay iya untang ihatud ngadto sa balay ni Richard. Apan nagsugat sila sa karsada. Kay si Richard wa sab diay nahimutang nga wa gyud nabalik niya ang iyang attachè case.

Kababata ug suod nga managhigala ang duruha. Bag-o lang niabot si Richard gikan sa Saudi Arabia diin nagtrabaho isip welder balig duha ka tuig. Si Jack nagkalingawlingaw og drayeb og taksi samtang naghulat sa iyang tawag sa giaplayan para abroad. Information Technology ang nahuman ni Jack.

“Salamat kaayo, bay, nga nakuha gyud nimo. Nia ra ba sulod ini akong passport, bank book sa akong dollar account sa banko. Ug cash nga pocket money nako, bali’g otsenta mil pesos ni Richard nga mapahiyomon.

Gidawat niya ang attachè case. Gilamano ug gihangop ang higala. Giagbayan ni Richard si Jack nga dalang gakos sa mga abaga ini ginamit ang walang bukton kay nagbitbit sa attachè case sa iyang toong kamot. Gihapuhap ug gipikpik ni Jack ang bukobuko sa higala ginamit ang walang kamot.

Lawom na ang oras gabii nga niadto sa ilang balay ni Jack si Nino amahan ni Richard ug si Abet manghud nga dalaga ni Richard. Nagpakitabang sila ni Jack mahitungod sa problema nila.Kay sa pag-abot ni Richard sa ilang balay, igo lang nibundak sa iyang duha ka dagkong bay nga gisudlan sa mga sinugatan. Unya natulog dayon sa iyang lawak kay pwerte nang huboga pag-abot. Unya sa pagpangukay nila sa mga dalang bag ni Richard, nasabtan nila nga duna gyuy wa nadala ni Richard. Kay wa sila kakita og passport ug cash nga salapi. Gipukaw gyud nila si Richard. Bisa’g lango na kaayo.

“Pila man ka buok imong dalang bag?” ni Abet ngadto’s maguwang.

“Tulo” ni Richard nga nagkanguhal ug nagpiyong nga nagtabi.

“Duna kay nabiyaan sa taksi nga usa” ni Niño ug Abet. “Ugma na lang to pangitaa!” ni Richard nga daw way kabalaka tungod sa ka hubog. Tulo man silang kauban sa trabaho nga nagsakay sa ayroplano gikan sa Saudi Arabia. Kay uhaw kaayo sila’g inom, nangita dayon sila’g imnanan paghugpa nila sa airport sa Mactan.

“Unsa mang hitaboa nga nabiyaan man nimo imong attachè case sa taksi?” ni Jack.

“Hubog man god kaayo ko gabii. Pag-abot gyud nako tungod sa among balay, gipaabli nako ang baggage compartment sa taksi. Gibiking nako ang duha ka bag sa tagsa ka kamot. Kay akong duha ka kamot puro na may gigunitan, abi nako’g mao ray akong dala. Gisirhan nako ang baggage nga abi nako’g wa nay sulod,” ni Richard. Gitrapohan og abog ang attachè case.

“Maayo gani kay sa pagpara nako ni Aldwin ug pagpangutana kun una ba siya’y pasahero gihatud dinhi, nitando siya. Ug nisumpay pa gyud nga duna tingale nabiyaan sa baggage” ni Jack.

“Unya, adto na ko bay. Adto lang unya sa balay karong gabii. Adto ta manihapon. Unya dyaming dayon ta” ni Richard. Niagbay na sab sa higala.

“Sige. Pero ato untang pahalipayan si Aldwin nga nitug-an gyud nako nga may nahibilin sa iyang taksi. Kay kun uban pa to nga di motug-an, TY gyud imong attachè case. Sa akong bahin way problema. Wa ko magkinahanglan og pahalipay. Amigo god ta. Kalipay lang nakong nakatabang nimo” ni Jack.

Nagpahiyom. Naisang kilay ni Richard.

“Ah, obligasyon nila ang pag-uli sa nabiyaang bagahe sa taksi, ngadto sa pasahero” pintok nga tubag ni Richard.

Nitalikod dayon. Wa na lang nitingog si Jack. Nitalikod na lang sab siya.

“Obligasyon bitaw. Pero, daghan bayang di motuman og obligasyon. Labi nag, way narekord sa plate number ug ngalan sa taksi” ni Jack. Apan layo na si Richard. Wa na kadungog.