Sige'g away

Dear Tita Salie,

Maayong adlaw, tagoa lang ko sa pangalan nga Je, dunay anak 1 apan wala pa makasal, nagpuyo pa lamang kami sa akong partner karon.

Sa una nagtrabaho ko sa MEPZA apan nagpabayad ko ug karon ania ako nagtrabaho sa resort dinhi sa Cebu.

Nagproblema na gyud ko sa akong kahimtang karon uban niining akong live-in partner. Unsaon nga kada-adlaw na lang mi mag-away, Tita. Nawad-an nako og gana nga ipadayon pa ang among relasyon. Tungod usab sa among kahimtang maoy gusto sa iyang kaliwat nga magbuwag na lang mi kun ugaling wala mi plano nga magpakasal kay kada-oras na lang gyud mag-away mi.

Apan dihang ako siyang giingnan nga magbulag mi iya man hinuon kong giingnan nga iya kong patyon kun akong tinud-on. Mahadlok usab ako tungod kay ang iyang iyaan mao ra ba kini ang gibuhat ngadto sa iyang bana. Iyang gipatay ang iyang bana samtang natulog.

Pero nakadesisyon na gyud ko nga makigbulag niya kay mora man og wala’y grasya nga moabot namo tungod kay awayon man mi.

Karon duna koy uyab, usa ka estudyante. Nagsabot na mi nga magminyo sunod tuig kay mo-graduate na man siya. Apan wala nako siya sultihi mahitungod sa akong kinabuhi ug bisan sa akong pangalan lahi ang akong gitug-an kay nahadlok ko nga mahibaw-an. Unsa may akong buhaton karon, Tita? Palihog pasabta ko. Thank you very much. -- Je

* * *

Maayong adlaw usab Je,

Dili gyud maayo ang imong gibuhat. Gipul-an kana sa imong unang relasyon busa karon nangita ka og laing kalipay. Karon nga duna kanay uyab ug nagsabot mo nga magminyo human sa iyang pag-eskuwela. Nagtuo ka ba nga mahuman na ang imong problema tungod kay lain na nga tawo ang imong kauban?

Nigawas ka sa unang problema, Je, apan laing problema na sad ang imong nasudlan. Nagtuo ka ba nga dili mahibaw-an ang imong tinagoan? Hinumdomi nga duna kay anak ug dili gyud kini nimo puwede nga tagoon hangtod sa hangtod. Mahibaw-an gyud kini sa imong uyab ug sa iyang pamilya. Kun mahibaw-an kini madawat ba nimo nga ingnong mangingilad? Kay nagpaka-aron ingnon ka man nga wala pay kabilinggan. Nangilad ka ug namakak pa gyud ka sa imong pagkatawo. Ug sigurado ko nga dili ka gyud madawat sa imong uyab tungod sa kamatuoran nga imong gitagoan.

Mas maayo pa siguro kun imong tun-an nga mo-work ang inyong relasyon sa imong live-in partner kay duna na man moy anak. Tun-i unsaon nga magka-close mo pagbalik aron malipayon ang inyong pagpuyo. Planoha ninyo og maayo nga modakong edukado ang inyong anak ug mas maayo kun magpakasal na mo. -- Tita Salie