Dukirok

Gula 7

Nangandam si Tacio alang sa trabaho, apan kalit misantup sa iyang kaisipan nga wala man diay trabaho karong adlawa kay gisibog ang holiday. Si Joy dayon ang misantup sa huna-huna ni Tacio.

"Joy, wa man diay mi trabaho karon mag-beach ta," gitawgan ni Tacio si Joy. Wala g'yud mobalibad si Joy sa pagdapit ni Tacio. Nagkasabot sila nga magtagbo sa usa ka lugar.

"Mag-rent lang ta og sakyanan Tass, makamao ka ba mo-drive?" gitawag ni Joy si Tacio. Tuod, nag-rent si Tacio kotse sa usa ka rent-a-car ug giadto niya si Joy sa iyang balay.

Wala na manaug pa si Tacio sa kotse. Nakita ni Tacio nga naghunghongay ang mga tabian nga silingan ni Joy pagkakita nga gikuha kini og kotse. Nagpanglad-ok usab sa laway si Tacio nga nagtan-aw ni Joy nga nagsul-ob lang og short pants.

"Gituyo nako nga mag-short aron masuya ang akong mga silingan nga tsismosa," matud ni Joy. Igo lang mipahiyom si Tacio apan ang kamot niya gikan nga nangambyada didto gipatung sa paa ni Joy.

Gipasagdan lang usab ni Joy si Tacio nga matag karon og unya, pisil-pisilon niini ug hapohapon ang iyang paa.

"Wala g'yud ko makasabut Joy, mora ko'g mabuang nga dili makakita nimo sukad nga nagkarelasyon kita kagahapon," ni Tacio pa ngadto kang Joy. "Saba diha uy, bulatik," tubag ni Joy nga nagngisi.

"Tug-ani ko Tass, sa imong trabaho sa SSS daghan ka tingali og mga byuda nga nauyab no?" wala makapugong si Joy sa pagpangutana. Wala usa motingog si Tacio, mora'g may gipinsar.

"Tinuod kana Joy. Gihinganlan gani ko sa akong mga kauban og dukirok kuno sa mga babaye. Dili baya byuda ra ang akong narelasyon, duna sa'y mga apo ug anak sa namatay," ni Tacio pa.

Mora'g wala makagusto si Joy sa iyang nadungog. Milingiw kini ug nagpakahilom. Nakasabut si Tacio nga nasakitan si Joy.

“Sus        ayaw na'g huna-hunaa ang akong kagahapon Joy, ang mahinungdanon nga kita na karon ang nagka-relasyon ug ikaw na ang akong pakaslan," matud ni Tacio nga misulod na sa Seaside beach.

Mikuha sila og cottage. Gipahiluna nila ang ilang dala. Giparaygan dayon ni Tacio si Joy. "Ayaw na kaguol Joy, huna-hunaa nga kita na ang mag-uban. Wala ko magkomedya, in-love na in-love ako kanimo," matud ni Tacio.

Nagparayganay dayon silang duha ug giaswat ni Tacio si Joy ug gipahiluna sa higdaanan.  (Kataposan)