Dako ang kahisagmuyo sa mga panatiko sa boksing sa kapildehan ni Adolfo. Wala sila magdahom nga maparot kini sa dakong kasayon ni Vorapin. Nakaila ug nasayod ang katawhan sa katakos ni Adolfo. Mangtas kini sa ibabaw sa ring. Si Vorapin ang underdog sa ilang panagsangka. Apan nahitabo ang dakong balit-ad sa gipaabot sa kadaghanan. Gipatikangkang ni Vorapin ang kampeyon sa una pang hugna sa ilang panagsangka.
Nakapanglingo si Melchor nga naghunahuna sa nahitabong baligho. Apan sa iyang kahiladman didto’y daghang alibangbang nga mikapakapa ug may lahi nga pagbati nga miunlod sa iyang dughan. Dihay basuni nga nahilis sa iyang hunahuna. Hilwas ug tawhay ang iyang pamatyag sa iyang kaugalingon. Luag ang iyang ginhawaan. Sa iyang handurawan nabukas ang usa ka botelya sa serbesa ug may nakigsingki kaniya og baso bisan dili siya moinom sa maong matang sa ilimnon. Miaslay ang kahimuot sa iyang panagway. May paglaom nga miamag sa iyang kasingkasing. Apan wala siya makasabot sa lintunganay sa iyang gibati.
Pagkaugma, human sa pamahaw, miadto si Melchor sa payag sa iyang Tiyo Tibur. Naabtan niya kini nga nagdukdok sa makinilya. Dugay kining nakabati sa iyang pagsangpit, timaan nga ang hunahuna niini gibitad ngadto sa layong panaw sa imahinasyon. Mihunong kini pagsulat pagkakita kaniya.
“Sugilanon na sab na, Tiyo?” ni Melchor pa nga midalikyat pagdungaw sa papel nga gitangag sa makinilya. -- Sumpayan pa