Dukirok

Gula 3

"Ha? manguyab ka'g byuda sir?" pangutana nga sagol-komedya ni Joy ngadto kang Tacio. Mingisi si Tacio nga wala dayon makatingog. "Ngano man diay'g byuda, basta gwapa," ni Tacio nga nakakita'g tubag.

"Sige, kun ma-approve unya molusot na ang akong pensyon, makigdeyt ko nimo Tass," matud ni Joy. "Sugton nako nimo anang adlawa? Kun sugton dayon ko nimo ako dayong ipa-release ang tseke ugma," ni Tacio pa nga nagngisi nga nagtutok kang Joy.

Tuod nagkasabot silang duha. Sugton ni Joy si Tacio kun mapa-release niini ang pensyon sa namatay niyang bana inigka-ugma. Naghinam-hinam si Tacio kay ang tinuod giaprobahan na sa ilang manager ang tseke sa pensyon alang ni Joy.

"Hangyo lang unta ko nimo Tass, ayaw lang pagpirmi og anhi sa balay kay ngil-ad ang pagtan-aw sa mga silingan nako nga bag-o pa gani namatay ang akong bana ug mikiring-king dayon ko," giingnan ni Joy si Tacio.

Gisabot ni Tacio ang hangyo ni Joy. "Walay problema Joy. Mas maayo 'sab nga adto ra ta magkita sa gawas."

Wala kaayo magdugay si Tacio sa balay ni Joy. Paggawas niya sa balay, nakita tuod niya ang mga silingan ni Joy nga nagpundok sa unahan ug nagsigi'g lantaw sa balay ni Joy.

"Unsa diay tuyo ni Joy kanimo sir?" matud sa usa ka babaye nga wala gayud makaantos, nangutana gayud ni Tacio. "Nagpatabang siya nako nga mapadali paglusot ang pensyon sa iyang bana nga namatay," gipasabot ni Tacio ang tsismusa nga silingan ni Joy.

Pagka-ugma. Giteksan dayon ni Tacio si Joy ug gipahibalo nga aprobado na ang iyang pensyon ug mahimo na nga makuha ang iyang tseke. "Ako g'yud ni nga gipaspasan sa pag-follow up Joy kay para sugton na ko nimo."

"Sure," reply ni Joy kang Tacio. Ala una sa hapon mitunga si Joy sa opisina ni Tacio. Tam-is kaayo kini og pahiyom ngadto kaniya. "Pwede ba ko nimo kuyogan nga magpa-encash?" giingnan ni Joy si Tacio.

Wala mopasalig si Tacio apan nananghid siya sa iyang division chief ug gipatoo nga ig-agaw niya si Joy nga magpauban sa pagpa-encash sa iyang tseke. "Tana, dili lang ta magdugay. Sa PNB City Hall lang ta magpa-encash," ni Tacio pa.

Nagkuyog ang duha nga nanakay og taksi paingon sa bangko. Didto sila manglingkud sa luyo nga lingkoranan. "Hala!" nakapanghikap sa dughan si Joy nga wala makatoo sa kadaku sa kantidad nga diha sa tseke. (Sumpayan)