Ang manghatag may madawat sab

Kinsa may team leader ninyong tulo?” pangutana sa customer nga hamtong nga lalaki nga nag-short-pants og stripe nga asul ug nag-insert og T-shirt nga checkered nga lalag. Singkwentahon na iyang pangidaron. Iyang tupe sama sa actor nga si Derek Ramsay. Iyang giduol ug gipangutana si Jaymar paghuman niya’g sinyas nga human na’g limpiyo ang Crosswind nga puti.

Alas onse imedya na ron sa buntag. Usa ka oras na ang nakalabay dihang nisulod ang maong sakyanan sa hugasanan og sakyanan sa Banilad ning dakbayan nga gitrabahoan ni Jaymar. Katabang ni Jaymar sa paglimpiyo sa sakyanan sila si Celso ug Willy. Nagbarog sila sa duol sa walang kilid sa sakyanan. Ug nagkalingaw og trapotrapo niini.

“Ako sir,” ni Jaymar. Nanglab-ok sa laway sa kakulba. Kay medyo istrikto og hitsura ang customer. Ug karon pa mahitabo nga may customer makighinabi niya.

“Wa pa gani siya katan-aw sa sakyanan kun maayo bang pagkalimpiyo, duna na dayon siya’y reklamo?!” tuaw ni Jaymar sa hilom.

Nangandam siya’s iyang kaugalingon kun unsa gyu’y reklamo sa customer. Iya rang sakyanan ang gipalimpiyohan karong buntaga. Pero puwede makasulod dinhi ang upat ka sakyanan.

Sa estambayan sa customer sulod sa compound sa Nineveh Carwash Center, nagbasabasa lang ang customer og libro. May mga lamesa sa estambayanan ug may mga libro ibabaw niini. Apan nagdala gyud ang customer og iyang kaugalingong libro. Usahay litukon niya iyang gibasang Iningles. Morag DJ sa radyo iyang tingog kun mobasa’g kusog.

Gitunol sa customer ang bayad sa pagpa-car wash nga P130.00 ngadtong Jaymar. Gidawat niya.

“Salamat sir” ni Jaymar. Nipahiyom og gamay.

“Mangutana unta ko. Kun pananglitan dunay ikaduhang kotse nga niabot. Magpa-car wash sab. Kinsay unang mahuman?” sa customer.

“Natural, ang imo gyud, sir. First-come-first-served man mi, dinhi” ni Jaymar nga nagpahiyom.

“Kun pananglitan, ikaduha kong niabot. Unya may niabot ikatulo, dayon may ikaupat. Kinsay unang mahuman?” dugang sukot sa customer.

“Ang mauna ang una. Imo ang ikaduhang mahuman,” ni Jaymar.

“Saktong pagkatubag,” nipahiyom ang customer.

“Nia rang yawe sa sakyanan, sir o” ni Jaymar nga nagtunol sa yawe ngadto sa customer. Gidawat sa customer.

“Nganong nakapangutana man diay ka sir mahitungod sa first-come-first served?’ ni Jaymar. Wa na mahadlok mangutana.

“Karon pa ko kapa-carwash dinhi. Suki ko sa Green Meadow Carwash sa Canduman. Taga-Canduman man ko. Apan nibiya ko didto. Kay makalagot ilang paagi. Katulo na ka higayon nga una kong niabot unya giawahi paghuman akong sakyanan paglimpiyo. Wa lang ko nireklamo kay duha ra man mi ka sakyanan niadto. Sa katapusan nakong palimpiyo, upat mi ka customer. Ikaduha kong niabot. Unya giuna nila’g human ang ikatulo ug ikaupat. Gipaulahi ko. Nakapangasaba gyud ko’g kadiyot!” sa customer.

“Mao lagi nay nakaparat sa ubang magserbisyo. Abusohan imong kaayo” ni Jaymar.

“Sakto ka. Dagko ko’g hinatagan og tip. Kadtong ilang giuna, ambot og nihatag ba to bisa’g singko!” sa kustomer.

“Nganhi sir, seguradong di gyud ka magmahay. First-come-first-served gyud mi. May tip o wa” ni Jaymar.

“Mudawat ba mo’g tip?” sa customer. Nipahiyom og dako.

Dugay’ng nakatubag si Jaymar. Nahuwasan siya’s kakulba.Ug napulihan og kahibulong. Abi’g nagkomedya ang customer.

“Kun kinasingkasing ang paghatag, nganong dili” ni Jaymar nga nagduhaduha sa iyang tubag. Nipahiyom siya’g dakudako.

“Matud pa sa Bibliya, naa sa paghatag nga ikaw makadawat. Ako, mohatag ko, unya makadawat ko’g kalipay kun inyong dawaton akong gihatag. Mao nay akong panabot sa bersekolo,” sa customer.

“Nagkuot sa iyang pitaka sa bulsa sa luyo.

“Disyembre na man sab ron. Isip pinaskohan” timang ni Celso. “Kadali ra gyud sa panahon. Pasko na man diay tuod” ni Willy. Nagtinan-away silang tulo.

Nitunol ang customer og tibuok usa ka gatos ngadtong Jaymar. “Bahinbahin lang unya mo ana,” sa customer dayong sakay sa iyang sakyanan. (Kataposan)