Igo pa lang gani nga nakahigda si Donna gikang mitan-aw sa teleserye nga Walang Hanggan, nga gibituonan nila ni Coco Martin ug Julia Montes, mikiring na usab ang iyang selpon nga diha niya ibutang sa iyang may ulohan. Gipunit dayon niya ang selpon ug gibasa ang mensahe nga gipadangat ngadto kaniya sa usa ka tawo nga wala gayud niya mailhi. Wala man god ang ngalan ug numero niini diha sa phonebook sa iyang selpon.
Human niya basaha ang mensahe nga gipadangat ngadto kaniya, gibawsan dayon niya kini. Iya kining gipugos sa pagpatug-an sa ngalan niini. Kanunay man god kining moteks kang Donna, apan wala gyud magpaila ug daw dili gyud gani kini gustong magpaila. Ambot kun unsa kahay hinungdan?
Hinuon sa tuno lang sa tiniksan niini, masabot kaayo nga duna gyud kini gusto kang Donna. Kay kanunay man kining magpasumbingay. Nga dali ra usab kaayong masabtan sa makabasa sa iyang ipangteks. Bisan gani si Donna, nga wala pa kaayo’y kasinatian bahin sa gugma. Bata pa man god kaayo si Donna. Ug wala pa kaayo mag-apil-apil nianang gitawag og gugma. Hinuon, dili ikalimod nga daghan na ang naibog kang Donna. Kay hitsuraan man siya ug maayo pa og batasan.
Sa pagbalik ni Donna og higda nagngisi siya’g hunahuna kun si kinsa gyud kaha kining magsigi’g teks kaniya. Kay mora’g nakahasol man hinuon kini kaniya. Ilabi na kay mora sab siya’g gidutlan og gamay sa gipangteks niini ngadto kaniya. Sa iya hinuong pangidaron mora’g angayan na man usab si Donna nga mobati og gugma.
Sa pagsigi niya’g hunahuna nakahukom ra gayud si Donna sa angay niyang buhaton. Aron gayud niya mailhan ang nagsigi og teks kaniya. Sa hunahuna pa ni Donna mailhan ra gayud niya ang tawo nga nakapahasol kaayo kaniya.
Nianang pagkaugma, sayo kaayong niadto si Donna sa tindahan nga iyang gialagaran isip tindera. Ang tindahan nga gipanag-iya sa iyang uyoan nga naninda’g mga selpon ug mga load para sa nagkalainlaing mga networks sama sa Sun ug Smart.
Gipang-ukay dayon niya ang listahan sa mga namalit og load sa mga miaging adlaw. Ug gipangita niya ang numero nga susama sa numero nga gi-save niya sa iyang selpon. Kay wala man niya papasa ang giteks kaniya sa misteryosong tawo.
Sa pagsigi niya’g ukay, nakit-an ra gayud niya kini diha sa iyang listahan. Ug nakahunahuna si Donna nga atngan niya kun mopalit na usab og load ang maong tawo. Aron sa ingon, mailhan na gayud niya kini. Gisulat pa gani ni Donna ang maong numero sa likod nga bahin sa listahan. Aron masayon ra kaayo unya niya ang pagtandi niini kun duna nay mopalit og load.
Ug miabot ra gayud ang higayon nga gipaabot ni Donna. Kay nagpalit naman sab og load ang tawo nga kanunay’ng nagsamok kaniya. Nailhan man niya kini pinaagi sa pagtandi sa numero nga gidikta niini ug sa numero nga iyang gisulat sa likod nga bahin sa iyang listahan.
Wala na makasabot si Donna sa iyang gibati nianang higayona. Hinuon, nagpasulabi ang iyang kahimuot, kay sa iya karong nakit-an ug iya na gyud nga nahibaw-an, nga ang tawo diay nga magsigig’g teks kaniya, sama ra sa iyang apuhan. Kay edaran na man kaayo kini. (Kataposan)