Ibabao, Mandaue City
Paspasig padagan Bay, ni Gomer pa nga miawhag sa drayber sa taxi nga iyang giluwanan. “Mabiyaan ko sa akong flight sa ayroplano.” Moadto si Gomer sa Manila alang sa pagtambong og sales representative seminar nga pagahimoon nga pasiugdahan sa ulohang buhatan sa kompaniya sa softdrinks nga iyang gitrabahoan.
Gipakusgan sa drayber sa pagpadagan ang gimaneho niining taxi nga mitadlas sa dalan Natalio Bacalso sa dakbayan sa Sugbo apan gisugat sila sa traffic enforcer sa ilang paghidangat sa eskina Jones Avenue ug misinyas kini sa pagpahunong sa ilang sakyanan.
“Nganong gipahunong man atong sakyanan nga red man unta ang signal?” ni Gomer pa ngadto sa drayber sa taxi.
“Molabay ang daghang mga tawo Sir nga mikuyog sa prayer rally,” tubag usab sa drayer ngadto kaniya.
“Prayer rally?’ daw misaka ang kilay ni Gomer. “Kinsa man ang nagpasiugda niana?
“Ang atong kaparian Sir ug ang grupo sa mga tawo nga supak sa RH Bill nga gituki karon sa atong mga magbabalaod sa Kongreso.”
Gitan-aw ni Gomer iyang relo de pulso ug nagtug-an kini nga untop na alas 12 sa kaudtohon ug alas 12:30 sa udto ang oras sa schedule sa ayroplano nga iyang sakyan paingon sa Manila nga maoy hinungdan nga wala na siya mahimutang.
“Boss!” ni Gomer pa ngadto sa traffic enforcer. “Dili mahimo nga moagi lang mi kadiyot?”
“Sorry, Sir,” sa traffic enforcer pa. “Dili mahimo kay dili na unya nako kapugngan kun mosunod sad sa pagpanagan ang mga sakyanan nga naa sa inyong luyo.”
Gilingi ni Gomer ilang luyo ug maoy nakita niini ang daghan usab kaayong sakyanan nga nagsunod kanila.
“Pastilan sad ni sila, uy,” ni Gomer pa nga gibati na og kapungot niining higayona. “Naglanganlangan man sa mga tawo nga nagdali.”
“Maghuwat lang ta og kadiyot nga molabay sila sir,” sa drayber pa nga misulay sa pagpakalma kang Gomer. “Dili man na sila magdugay kay dili man kaayo taas ang linya sa nanguyog sa prayer rally.
“Madala og dili madugay nga mabiyaan man ko sa akong flight sa ayroplano,” tubag ni Gomer nga mitunol sa iyang plite ug nagdali sa pagkanaug sa giluwanan niining taxi.
Nagdali sa paglabang si Gomer sa pikas habig sa dalan ug misuot kini sa nanglakaw nga mga tawo nga mikuyog sa gipasiugdahang prayer rally. Sa iyang paglabang sa pikas habig sa dalan maoy gihimo ni Gomer ang pagpangita na usab og laing taxi nga iyang kasakyan paingon sa Mactan Cebu International Airport (MCIAA) sa dakbayan sa Lapulapu.
Nakakita man tuod siya og laing taxi nga iyang kasakyan apan milungtad usab og pipila ka gutlo ang iyang pagpaabot maoy hinungdan nga misamot na hinuon iyang kalangan.
Dihang nahidangat na si Gomer sa MCIAA mao usab ang paglupad sa abyon nga iya untang sakyan paingon sa Manila.
‘Change passenger na lang ka sir,” sa teller pa ngadto kang Gomer. “Sa 5pm nga flight na lang ka.”
Walay nahimo si Gomer gawas sa pagtuman na lamang sa gisugyot kaniya sa teller. Apan sa paglabay sa pipila ka gutlo niyang pagpaabot kalit lang naukay ang mga tawo ug kawani sa tugpahanan sa balita sa telebisyon labot sa ayroplano nga nahagsa.
Wala makalihok si Gomer sa iyang gilingkoran dihang nasuta ang balita nga ang abyon nga nahagsa mao unta ang iyang sakyan paingon sa Manila. Naghunahuna si Gomer sa prayer rally sa RH Bill nga maoy nakaingon niini. Mihangad siya ug nakatuaw. “Salamat Lord!” (Katapusan)