Nagbasul ako

Wala lung-i pagsunod-sunod sa taksi nga gisakyan ni Dario ang awto nga gisakyan sa iyang asawa. “Bai, misulod man sa motel,” matud sa taksi driver. “Sulod ‘sab,” matud ni Dario.

Nagkurog na sa kasuko si Dario. Nagpangagut ang iyang bag-ang sa kalagot. Nakasabot na siya nga nagbudhi kaniya si Stella. Gipasulod pag-una sa roomboy ang sakyanan nga gisakyan nila ni Stella ug Roman mao nga nakita ni Dario kun hain ang ilang kwarto.

Dayon, gisinyasan sa roomboy nga pasudlon sa bakante nga room with garage ang taksi nga gisakyan ni Dario. “Sulod lang bai, ug ayaw pagsaba kun unsay imong nasaksihan,” matud ni Dario nga mitunol sa drayber og P200.

Swerte kay nagtupad ra ang kwarto nga gisudlan nila ni Stella ug Roman sa kwarto nga nahimutangan ni Dario. Gilili ni Dario ang roomboy. Nagbutok-butok sa kakulba ang dughan ni Dario nga naghuna-huna kun unsay iyang buhaton.

May nakita siya nga dos-por-dos nga mubo nga kahoy duol sa iyang nahimutangan. Gilili ni Dario ang roomboy. Swerte kay milakaw kini paingon sa gate sa motel. Dali siya nga migawas ug mitapon sa pikas grahe.

“Animal! Awto kini sa negosyante nga si Roman!” nahasinta si Dario. Karon, nakaila na siya kun kinsa ang kauban ni Stella sa motel. Gihugtan paggunit ni Dario ang dos-por-dos. Hinay siya nga misaka sa hagdan. Gipaduol ni Dario ang iyang dunggan sa pultahan.

Kapin na sa tunga sa oras gikan sa ilang pagsulod. Nanukad si Dario. Dayon, kusug niya nga gitindakan ang pultahan. Milagubo ug natukas ang pultahan. Dili kaayo hayag ang suga apan naklaro gihapon ni Dario nga parehong walay sapot ang iyang asawa ug si Roman.

“Dario! Darrr!” pareho nga nakuratan ang duha. “Mga maluibon!” nakasinggit si Dario nga mihana sa pagbunal kang Roman. Gisagang ni Roman ang unang hapak apan nalukapa siya sa sawog human mabali ang iyang bukog.

Gibunal-bunalan pag-ayo ni Dario si Roman sa bisan asa nga parte sa lawas, apil na sa ulo. Wala kini maglihok. Naghilak si Stella nga nangayo’g pasaylo kang Dario, apan gihapsan gihapon siya’g hapak sa kahoy mao nga nalukapa si Stella sa sawog.

Nakadungog si Dario nga dunay siren sa police patrol car. Wala madugay, nanulod ang mga polis. “Husto na! Surrender kanamo!” singgit sa usa ka polis. Napatay g’yud ni Dario si Roman. “Ayaw kabalaka aning imong kaso Dario. Ubos sa balaud, destierro ra ang imong silot bisan og napatay nimo si Roman,” matud sa imbistigador sa kapolisan. (Kataposan)