Pagbugtaw sa Damgo

Mipadayon siya pagpakli. Unya, dihay nakahawid sa iyang pagtagad. Usa ka pahibalo. Gikan sa Cultural Center of the Philippines ang maong pahibalo. Maglusad sila’g tigi sa panulat. Modawat sila’g mga salmot nga balak ug sa sugilanon sa nag-unang mga pinulongan sa Pilipinas, apil na ang Binisaya. Nakabig si Melchor pagbasa sa lagda sa tigi.

Gitikyop ni Melchor ang basahon human mabasa ang pahibalo mahitungod sa tigi sa panulat. Sa iyang hunahuna dihay salindanaw nga nagsakdapsakdap. Unsa kaha kun mosulay siya’g salmot sa maong tigi? Naikag siya sa kadako sa ganti nga ihatag sa CCP sa palarang magsusulat nga makadaog sa tigi. P200,000.00 ang unang ganti uban ang tropeyo.

Misugyot ang iyang hunahuna nga dili una ipadala sa Bantayog ang sugilanon nga bag-o lang niyang nahuman pagsulat. Iya una kining ipanimpalad sa tigi sa sinulatay nga gipasiugdahan sa CCP.

Apan dihay laing pangutana nga milusad sa iyang hunahuna nga nagpasiugda’g kabalaka. Makadaog kaha siya? Ug dihay pagduhaduha nga inanay nagbubo og tubig sa iyang kadasig.

Misantop sa hunahuna ni Melchor nga wala siya’y paglaom nga makadaog sa tigi. Karon nga napatik ang pahibalo sa CCP sa Bantayog, seguradong manggimok ang mga banggiitang magsusulat pagsalmot sa tigi tungod sa kadako sa ganti. -- Sumpayan pa