"Maniniyot"

Sukad pa sa ulitawo ug hangtod nga naminyo na lang si Bador, ang iyang panginabuhi mao ang pagka maniniyot kon kodaker (photographer). Mahiligon kaayo siya sa camera hinungdan nga nakabaton siya og alamag sa pagpangudak ug mao kini ang matang sa iyang pangita nga maoy gisaligan sa pagbuhi sa tulo ka mga anak uban sa iyang asawa nga si Helen.

Walay bisyo si Bador. Dili siya motabako ug labi pang dili moinom sa mga ilimnong makahubog ug labaw sa tanan dili siya sugarol sama nianang uban nga atua ra magyampungad sa imnanan ug sa sugalan. Ang iyang panahon gigugol sa pagpangodak ug sa iyang pamilya.

Ang income kon kita ni Bador sa iyang pagka maniniyot (maoy tawag sa mga tawo kaniya) dili man maisip nga dako gayod apan igo-igo gayong makabuhi og usa ka pamilya ug makapaedukar sa mga anak. Hunahunaa ra god, sa adlaw’ng Sabado nga maoy regular nga adlaw sa pamunyag denosena ang bunyagan. Ug sipyat na og walay magpabunyag.

Anaa pay kasal halos kada Domingo, ingon man mga minatay nga ilubong ug uban pang halandumong okasyon, kining tanan dili gayod sipyaton ni Bador sa pagkuha og hulagway.

Sa panahon sa gradwasyon sa mga tulunghaan kindergarten man, elementarya ug high school, sa bisan asang barangay, dili gayod hitaligam-an ni Bador ang pagkuha og hulagway sa mga gradwado lakip na ang mga ginikanan niini nga garbo usab kaayo nga magpahulagway uban sa ilang mga anak nga mipaso.

Nakabaton si Bador og daghang suki sa iyang pagka maniniyot tungod kay nindot siyang mokuha og hulagway ug kadali ra usab siyang makapa-develop kay iyang pangunayan sa paghatod ngadto sa developing center sa dakbayan sa Lapulapu.

Sa iyang pagka maniniyot ni Bador, starring siya kanunay kay anaa man siya sa tunga magpaso-paso, ilabi na kun pista ug adunay rayna nga koronahan, magsambilay siya sa iyang kodak nga Cannon ug kadali rang mohagtik ang iyang camera sa bisan unsang anggulo, side view man o front view, full shot o half shot, basta lagi, way giliitan igo kanunay sa kodak ni Bador. Kusog pa god sa kilat kun mo-flash ang iyang camera.

Pinaagi sa iyang pagpangodak naningkamot siya nga mahatagan og maayong ugma ang iyang mga anak. Hinungdan nga iya kining gipaeskuyla ug kaluoy sa Diyos, milampos kini nga nag-ulhos-ulhos pagtapos sa tagsatagsa nila ka mga kurso.

Si Philip nakatapos sa iyang Computer Science, ug atua na karon sa Taiwan magtrabaho, samtang si Ruby ug Mennie parehas og kursong natapos, Office Administration and Management.

Luyo sa kalamposan sa iyang mga anak, padayon gihapon si Bador sa naandan niyang pagpangodak.

Walay pagkutat ang bul-og sa iyang paninguha ug paningkamot nga nahisama kini sa tubig nga nakahunat na sa pagbul-og gikan sa mahabog nga bungtod. Kay ang iyang gugma isip usa ka photographer, alang kaniya, usa kini ka arte ug bililhon kaayo. Dili niya mahimong talikdan ug labi pang dili malaksi sa iyang balatian ang iyang pagka maniniyot kay tipik ug kabahin kini sa iyang kinabuhi ug sa iyang pagpakabuhi.

Mao kini ang gumaran kon pilosopiya nga iyang gisagop ug gikalawat. (Katapusan)